Аҟәа. Мшаԥымза 28, 2025 шықәса. Аԥсныпресс. Аԥснытәи Аҳәынҭқарратә Университет аҿы аԥсуа-қырҭуатә еиҿцәажәаратә процесс аҭоурых иазку адокументалтә цикл «Уи шаҟаз атәы» актәи ахәҭа ддырбеит.
«Абаза-ТВ» анапхгаҩы Руслан Ҳашыг ари аусумҭа ателехәаԥшратә команда ду аҭҵааратә усураны иуԥхьаӡар алшоит ҳәа иазгәеиҭеит:
«Иҳаҩсыз ашықәс аҩныҵҟа ҳара аԥсуа-қырҭуатә еиҿцәажәаратә процесс аҭоурых иазку адокументалтә фильмқәа рцикл аҭыжьра ҳнапы алакын. Афильмқәа зегьы сааҭк-сааҭк ирҭагӡоуп. Уаҟа еизгоуп Аԥсны ҳаамҭазтәи адипломатиатә ҭоурых аҿы акыр зҵазкуа ахҭысқәа».
Иара игәаанагарала, хымԥада зегьы ирдыруазароуп аиааира агареи ахьыԥшымра аиуреи рзы ҳажәлар знысыз амҩа атәы. Афильм аҿы иаарԥшуп адипломатцәа арратә иааира ашьақәырӷәӷәара шрылшаз атәы. Адокументалтә фильмқәа ирылагалоуп Аԥсны Раԥхьатәи Ахада Владислав Арӡынба иқәгыларақәа, Аҳәынҭқарра Ахада ихаҭарнак Анри Џьергениа ақырҭуа ган рыҿцәажәарақәа рҿы ажурналистцәа ириҭаз аинтервиу. Иара убас, афильмқәа ирнылеит аиҿцәажәарақәа ирылахәыз - Сократ Џьындџьал, Сергеи Шамба, Станислав Лакоба, Виачеслав Чыркба, Асҭамыра Ҭаниа, уҳәа егьырҭ аӡәырҩы ринтервиуқәа.
