Аҟәа. Лаҵарамза 9, 2025 шықәса. Аԥсныпресс. Аԥсны Аҳәынҭқарра Ахада Гәынба Бадра Аԥсны жәлар Аџьынџьтәылатә еибашьра дуӡӡаҟны Аиааира 80 шықәса ахыҵра рыдиныҳәалеит.
Адныҳәалараҟны, ҷыдала, иҳәоуп:
«Акыр иаԥсоу аветеранцәа!
Ҳаҭыр зқәу ҳауаажәлар!
Гәык-ԥсык ала ишәыдысныҳәалоит Аџьынџьтәылатә еибашьра дуӡӡаҟны Аиааира 80 шықәса ахыҵра амш.
Иахьатәи аныҳәа – хьааи гәырҩеи шацугьы, гәалаҟара ҷыдак ацуп, ныҳәа дуӡӡоуп Асовет Еидгыла ажәларқәа зегьы рзеиԥш, аԥсуа жәлар ҳазгьы.
Абри аибашьраан анемец мпыҵахалаҩцәа ирҿагыланы Аԥсадгьыл ду ахьчаразы игылаз ажәларқәа хацәнмырха инарывагылеит 55-нызқьҩык инареиҳаны Аԥсны аҵеицәа. Усҟан, абри ашықәс еиқәаҵәақәа раан Аԥсадгьыл ахақәиҭтәра рхы ақәырҵеит 17 нызқьҩык инареиҳаны ишәыдгылаз шәҩызцәа, шәыуацәа, шәҭынхацәа аӡәырҩы. Урҭ хашҭра рықәӡамкәа ҳгәалашәараҿы иҟазаауеит есқьынгьы.
Ҳара ҳрызгәдуны рыхьӡқәа ҳгәалаҳаршәоит Асовет Еидгыла Афырхаҵа ҳәа ахьӡ зыхҵоу 23-ҩык Аԥсны аҵеицәа, хҩык Аҳьӡ-Аԥша аорденқәа зегьы ранашьоуп. Арҭ аҳамҭақәа ирҳәоит урҭ Аԥсадгьыл ахь ирымаз абзиабареи, иаадырԥшыз ахамеигӡареи агәымшәареи ртәы.
Иахьа шәара – ари Аибашьра ду иалахәыз – фырхаҵара згым шәҭоурых иааӡоит абиԥара ҿыцқәа, ҿырԥшыга
бзианы ирыцуп хәызмаӡам шәгәалашәарақәа.
Акыр иаҳзаԥсоу аветеранцәа, абри амш аҽны ишәзеиӷьасшьарц сҭахуп агәабзиара, агәамч, ахирра!
Еибашьра ҟамлааит ари адгьыл аҿы! Ҳажәлар ирыгымзааит аҭынчра, аҿиара, аизҳазыӷьара ҟалааит!.
