Афильм аӡыргара рхы аладырхәит Аԥсны Аҳәынҭқарра Ахада Бадра Гәынба, Аҳәынҭқарра Ахада Иусбарҭа анапхгаҩы Беслан Ешба, Аҟәа ақалақь ахада Ҭемыр Агрба, акультура аминистр Даур Ақаҩба, Жәлар Реизара-Апарламент адепутатцәа, ауаажәларра рхаҭарнакцәа.  

Афильм Владислав Арӡынба аибашьра ҟалаанӡатәи ашықәсқәеи аԥсуа-қырҭуатә еибашьра аналага раԥхьатәи амзқәеи  рзы иусура атәы аанарԥшуеит. Ҷыдала ахшыҩзышьҭра аҭоуп Владислав Арӡынба – Асовет Еидгыла Иреиҳаӡоу Асовет адепутат иаҳасабала инаигӡоз иусура.

Аԥсны Раԥхьатәи Ахада иԥсҭазаареи ихьыԥшым Аԥсуа ҳәынҭқарра ашьақәгылараҿы иара инаигӡаз ароли рзы ргәаанагара рҳәеит Апарламент актәи ааԥхьара (1991 – 1996 ш.) адепутат,  аполитолог Наҭелла Акаба, афилологиатә наукақәа рдоктор, Аԥсны Ахада иҟны иҟоу астратегиатә ҭҵаарақәа Рцентр анапхгаҩы Виачеслав Чыркба, ашәҟәыҩҩы Фазиль Искандер.

Наҭелла Акаба еиҭалҳәеит Аԥсны Иреиҳаӡоу Асовет адепутатцәа нанҳәамза 14 рзы Аԥсни Қырҭтәылеи рыбжьара афедеративтә еиқәшаҳаҭра апроект алацәажәаразы ишеизаз атәы.  Убри аамҭазы Аҟәа иахаԥыруа иалагеит ақырҭуа арратә ҵәиԥрыгақәа, ақалақь иалалеит Қырҭтәыла Аҳәынҭсовет архәҭақәа ркәылӡтәы техника. «Ҭынчмҩала Қырҭтәылеи Аԥсни реизыҟазаашьақәа рҭышәынтәаларазы ашанс Қырҭтәыла инанагӡаз арратә агрессиа ала ихыбгалеит. Аҭоурых еимга-еимцарак ала аҽеиҭанакуан, аҽарццакуан», – ҳәа иазгәалҭеит лара.

Виачеслав Чыркба акыр шықәса Владислав Арӡынба аус ициуан. Иара ишазгәеиҭаз ала, Владислав Арӡынба аҵарауаҩ иаша изнеишьа акәын имаз, уи ахаангьы азҵаарақәа рыҭара дацәшәомызт, дагьацәхьаҵуамызт.

«Иара иҟаиҵоз зегьы асистемра аныԥшуан. Азҵаарақәа зегьы ирласны иӡбон. Иара аҭоурых аҟынтәи алкаақәа рыҟаҵареи уи аԥышәа ахархәареи илшон, иара мыцхәы идуумыз иԥсҭазааратә мҩа аҿы зегьы дрызҿлымҳан, есымша адырра ҿыцқәа раиура дашьҭан, иоуз аихьӡарақәа рҿы даанкылаӡомызт. Ари шамахамзар аполитик иузидымбало аҟазшьа ауп»,–  ҳәа инаҵшьны иазгәеиҭеит Виачеслав Чыркба.

Афильм иара убас ианылеит ашәҟәыҩҩы Фазиль Искандер Владислав Арӡынба абас ала дахьихцәажәо акадрқәа: «Аҭоурых аҭҵаара знапы алакыз анаукатә усзуҩны дшыҟазгьы, уи иара убас иаарылукааша аполитик иҟыбаҩ илан».

Афильм иалалеит Владислав Арӡынба Асовет Еидгыла Иреиҳаӡоу Асовет аизара Ду атрибуна аҟынтәи иқәгылара,  хәажәкырамза 17, 1991 шықәса рзы имҩаԥысыз Асовет Еидгыла аиқәырхара азы ареферендум, цәыббрамза 3, 1993 шықәса рзы Москва ақалақь аҿы имҩԥысыз Борис Ельцин, Едуард Шеварднаӡе, Владислав Арӡынба реиԥылара  акадрқәа.

Афильм ианахәаԥш ашьҭахь Аҳәынҭқарра Ахада Бадра Гәынба афильм аиҳабыратә классқәа рҿы аҵара зҵо аҵаҩцәеи астудентцәеи идырбазарц азы абжьгара ҟаиҵеит.