Аԥснытәи акоманда акаԥдан Ҭемыр Ҭаниа Аԥсныпресс акорреспондент диҿцәажәо ахәмарра аҽазыҟаҵара шымҩаԥысуа атәы еиҭеиҳәеит.

Ҭемыр Ҭаниа иҟаиҵаз адыррақәа рыла, акоманда апрограмма аҩра иаҿуп, аха иара уи адеталқәа ааимыртӡеит.

«Зегьы ҳақәгылараҿы ижәбараны шәыҟоуп. Уи ҳара ҳастиль иақәшәо, насгьы Аԥсны иазкны иҟалоит», – ҳәа иазгәеиҭеит иара.

Уи иажәақәа рыла, акоманда Илахҿыху Еиҿамсу Рыклуб (КВН) аҟынтәи ироуз ааԥхьара гәахәара дула ирыдыркылеит. «Ҳара ҳабаҩ ҳцәыласуп, ирласны ҳҽеизаҳгеит, ҳҿара ашықәсқәа ҳгәалаҳаршәарц ҳаӡбеит. Убри аан, ҳәарада агәыхыҭхыҭрагьы ҳқәыԥшра агәалашәарақәагьы ҳацуп… Ари ҳколлектив аҩныҵҟа акы иаламҩашьо аҭагылазаашьа зырҿио хҭысуп!» – ҳәа иазгәеиҭеит акаԥдан.

Сынтәа акоманда ҩынттәи аиубилеи азгәанаҭоит: акоманда аԥҵара аныҟала инаркны 25 шықәса аҵреи Иреиҳаӡоу Алига аҿы ачемпионс рыҟалара  20 шықәса ахыҵреи.