Дмитри Вольвач иазгәеиҭеит 2022-2025 шықәсқәа рзы апрограмма абзоурала ареспублика аекономикатә рбагақәа шеизҳаз: атауареикәыршара 60% рыла иазҳаит, атәыла аҩнуҵҟатәи ахашәалахәы — 180% инареиҳаны, абжьаратәи ауалафахәы аҩаӡара — 75% рыла.

«Ҳара ҳтәылақәа аамҭа иԥнашәахьоу аидгылареи аиҩызареи рыбжьоуп, ҳара ҳабжьара иҟаӡам, ҟалашьагьы амаӡам иузымыӡбо азҵаарақәа.Уааигәырӷьаратәы иҟоуп иара убас аԥснытәи ҳҩызцәа жәларбжьаратәи амшхәаԥштә актуалра злоу азҵаарақәа рыла  Урыстәыла апозициақәа иахьадгыло», — ҳәа иазгәеиҭеит аминистр ихаҭыԥуаҩ.

Рашәарамза 27 рҟынӡа Аԥсны Аекономикатә ҿиара аминистррахь идәықәнаҵоит аиқәшаҳаҭра апроект азы ажәалагалақәа, ахықәкытә рбагақәеи афинанстә цхыраара ахыҵхырҭақәеи налаҵаны.

«Апрограмма ҿыц аинфраструктуратә ԥкрақәа раԥыхра, аусуратә ҭыԥқәа раԥҵара, аҵараиуреи ахәшәтәреи рхаҭабзиара аиӷьтәра, аинвестициатә проектқәа рыдгылара ирызкуп», —ҳәа иазгәеиҭеит Дмитри Вольвач.

Уи иалҵшәахароуп 2030 шықәса рҟынӡа ареспублика ихадоу арбагақәа рынагӡара: атәыла аҩнуҵҟатәи ахашәалахәы аизҳара, атауареикәыршареи абиуџьеттә хашәалахәи 50% рыла аизҳара, урыстәылатәи атуристцәа 5 миллионҩык рҟынӡа анаӡара.

«Агәра ганы сыҟоуп, аԥснытәи урыстәылатәи аганқәа ҳәоуеиқәшәарала русеицура иалҵшәаны 2030 шықәсазы апрограммала  иазԥхьагәаҭоу аусмҩаԥгатәқәа, аекономика ашьҭыхра арбагақәа зегьы шынагӡахо: инацҵаны аусуратә ҭыԥқәа шаԥҵахо, аекономика аусхкқәа рҿы аулафахәы ашьҭыхра шалыршахо, ареспубликатә биуџьет ахь ашәахтә лагалақәа шацҵахо, иааизакны ареспублика аҿы аԥсҭазаара аҩаӡара ашьҭыхра шалыршахо», — ҳәа иҳәеит аминистр ихаҭыԥуаҩ.

Урыстәыла аекономикатә ҿиара аминистр ихаҭыԥуаҩ Дмитри Вольвач Аԥсныҟа иусуратә ҭаара аҳәаақәа ирҭагӡаны Аҟәа ақалақь аҿы, зҵакыраҿы ангиограф шьақәыргылахо ахәыҷтәы республикатә хәышәтәырҭа аргылара шымҩаԥысуа гәеиҭеит.  Иара убас иара даҭааит ахшхарҵәтә аалыҵ ҭзыжьуа азауад аргыларазы аинвестициатә проект аплошьадка. Иарбоу апроектқәа арегион амедицинатә  маҵзуреи агроааглыхратә комплекс аҿиареи  иазырхоуп.

Иара убас аусуратә визит аҳәаақәа ирҭагӡаны Аԥсны аԥыза-министр Владимир Делба ихантәаҩрала имҩԥысит Урыстәылеи Аԥсни рыбжьара асоциал-економикатә усеицура азҵаарақәа  рзы  аусуратә  еилатәара. Аилатәара аҿы ирылацәажәеит агәабзиарахьчара, аҵарадырра, анаука, акультура, аспорт аусхкқәа рҿы аус зуа ареспублика аусбарҭақәа русура аеффективра ашьҭыхра, аенергетика, атуризм, атранспорт, уҳәа ихадоу Аԥсны аекономикатә усхкқәа рыҿиара аусхкытә хсаалақәа рышьақәырӷәӷәара иадҳәалоу азҵаарақәа жәпакы  ирылацәажәеит.