Ари Аԥсны атеатр аҭоурых аҿы Агата Кристи лырҿиамҭақәа рыла иқәыргылоу раԥхьатәи аспектакль ауп.

Ӷәӷәала иауз аси амшцәгьеи  иҭанакыз, еиқәышәшәа иҟоу ақалақьнҭыҵтәи апансионат аҿы еизоит қьырала иҩноу ауаа. Зегьы ақалақь аҿы иҟалаз ауаҩшьра азы агәҭынчымра аадырԥшуеит, аха убри аан доусы дыгәҩараны дҟалоит. Араҟа инхоз руаӡәы иԥсыбаҩ анырыԥшаа ашьҭахь, ари апансионат «ҳәынаԥшьыганы» ирзыҟалоит ара иҟоу зегьы рзы…

Аспектакль угәҽанӡамкәа ицәырҵуа асиужеттә цәырҵрақәеи аибарххара зцу аинтригеи рыла игәылҭәаауп, уи ахәаԥшцәа аспектакль аҵыхәанӡа ргәы-хыҭхәыҭуа иҟанаҵоит. «Аҳәынаԥшьыга» уагәылазхало асиужети акомедиатә моментқәеи, ҟазарыла иаарԥшу ахаҿсахьақәеи урҭ рҟазшьақәеи узыргачамкуа аҵыхәтәеи ирыбзоураны атеатр аҭоурых аҿы зегьы реиҳа еицырдыруа, акыр иззыԥшыз апиесаны иҟалеит.

Аспектакль иалахуп (асценаҿы рцәырҵрала): Милана Ломиа, Аԥсны зҽаԥсазтәыз артист Рубен Депелиан, Руслан Жьиба, Мадлена Барцыц, Аԥсны зҽаԥсазтәыз артистка Наталиа Папасқьыри, Лиупчо Спасов, Леон Ӷәынџьиа, Емиль Петров.

Аспектакль аԥҵахоит Москва, Санкт-Петербург, Аҟәа ақәыргыларатә команда ала - арежиссиор Андреи Сидельников, асахьаҭыхыҩ-ақәыргылаҩ Илиа Кутиански, алашара ала асахьаҭыхыҩ, апремиа «Ахьтәы сабрада» (»«Золотая маска») алауреат Денис Солнцев, акостиумқәа рыла асахьаҭыхыҩ Наташа Шпанова, акомпозитор Алеқсеи Асеев.

Андреи Сидельников, арежиссиор-ақәыргылаҩ:

«Аспектакль аидеиа хаданы иҟоу  – ахара азыҟазашьаратә еилкаароуп. Дарбанызаалак аперсонаж ихатә маӡақәа имоуп: џьоукы машәырла ацәгьоура ҟаиҵеит, даҽа џьоукых изааигәоу ауаа рыхьчаразы  аиаша иҳәаӡом. Аха ус аку, анс аку, уажәымзар уажәшьҭан урҭ зегьы рхымҩаԥгашьа ахҟьаԥҟьақәа аарыдгылоит.

Иарбан усзаалакгьы ахҟьаԥҟьа амоуп, зны-зынла агәнаҳа зынӡа ушазыԥшым иаауқәшәоит. Абри зегьы ақәыргыламҭа ҵыхәаԥҵәара змам аморали аҭакԥхықәреи рызҵаарақәа рахь ухьарԥшуа инарҭбаау аудиториа азы  иактуалны, даара аинтерес аҵаны  иҟанаҵоит.

«Аҳәынаԥшьыга» — еилкаам аперсонажқәеи узқәымгәыӷуа асиужеттә хҭысқәеи рыла игәылҭәаау, ухызхуа ахшыҩ  архәмарра ауп.

Ари апиеса аиашара, ахара, ахҿыхра азҵаарақәа шьҭнахуеит, убри аан апублика афырхацәа ирыцны асиужет амаӡа аилкааразы аинтересс рызцәырнагоит. Аинтрига афинал аҟынӡа ишыҟац иаанхоит, ахәаԥшцәа еиуеиԥшым ацәыныррақәа рызцәырнагоит, дара рҿаԥхьа имариам аетикатә дилеммақәа ықәнаргылоит.

Ари баша спектакльӡам, уи ахшыҩи агәи рзы ԥышәараны иҟоуп, ари аиллиузиеи ареалреи рдунеи аҭаара иаҩызоуп, араҟа имҩаԥысуа зегьы ахәаԥшыҩ ихаҭа аусеилыргара ихы алаирхәазшәа инарбоит».