Аизга иара убас иалалеит цәыббрамза 3, 1992 шықәсазы аԥсуа-қырҭуатә еиҿагылара аҭышәынтәалареи амца аанкылареи рзы  Москва имҩаԥысыз Урыстәыла, Қырҭтәыла, Аԥсны анапхгаҩцәа реиԥылара аҟынтәи аԥсуа бызшәахьы еиҭагоу астенограмма.

Араҟа уаԥхьар ҟалоит Владислав Григори-иԥа Арӡынба Аԥсны афырԥҳәыс Ҭали Џьопуа илиҭаз аинтервиу, иара убас Аԥсны жәлар рпоет Мушьни Лашәриа  иажәеинраалоу ироман «Аԥсадгьыл» («Отечество») ацыԥҵәаха.

«Владислав изы ажәа» («Слово о Владиславе») – убас иахьӡуп Аԥсны еицырдыруа ауаажәларратә усзуҩцәа, аҵарауаа, асахьаҭыхыҩцәа Аҳәынҭқарра Актәи Ахада изы рҳәамҭақәа реизга.

Ашәҟәы Аԥсны Актәи Ахада Владислав Арӡынба диижьҭеи  80-шықәса аҵра инамаданы иҭыжьуп. Аизга аиқәыршәаҩцәа – ашәҟәыҩҩ, ажурнал «Алашара» аредактор хада Анатоли Лагәлааи ашәҟәыҩҩы Дмитри Габелиеи роуп.

Аизга ҭыжьын аҟәатәи «Аҭыжьра аҩны» аҿы.