Михаил Ведерников аԥсуа ган адкылара бзиа азы иҭабуп ҳәа раҳәо наҟ-ааҟ аусеицуразы азҿлымҳара шыҟоу азгәеиҭеит:

«Иахьа аусеицура аплан иалагалахо атемақәа рылацәажәаразы алшара ыҟоуп. Ҳара гәахәарыла ареспублика ахь иааҳашьҭуеит абизнесс-миссиа.  Аԥснытәи аусдкылаҩцәа иара убас Псковтәи аобласт ахь ааԥхьара раҳҭоит. Ҳара аекономика, акультуратә еимадарақәа, аԥышәеимадара, уҳәа азҵаарақәа ҳрылацәажәараны ҳаҟоуп», - ҳәа иҳәеит агубернатор.

Уи иара убас Псковтәи аобласт аҟынтәи ахәыҷқәа Аԥсны рыԥсшьареи аԥснытәи ахәыҷқәа Псков рыԥсшьареи аиҿкаара азҵаара алацәажәаразы ажәалагала ҟаиҵеит.

Аиԥылара ашьҭахь Владимир Делбеи Михаил Ведерникови ажурналистцәа рахь ицәырҵны урҭ рызҵаарақәа рҭакқәа ҟарҵеит.

Владимир Делба иажәақәа рыла, аганқәа ахәаахәҭра-економикатә, асоциалтә, акультуратә усхкқәа рҿы аусеицура азҵаарақәа ирылацәажәеит, Аԥсни УА Псковтәи аобласти ирыбжьоу аизыҟазаашьақәа аимабзиаратә ҟазшьа шаҵоу ҩаԥхьа ишьақәдырӷәӷәеит.

«Ҳара ҳаиқәшаҳаҭхеит аекономика аусхкы аҿы аусмҩаԥгатәқәа зегьы деталла аус адулара шалыршахо азы, аҽҳәарақәа шьақәҳарӷәӷәеит. Ҳара ҳколлегацәа ирыдаагалеит нанҳәамза 25-нӡа аусмҩаԥгатәқәа рыплан аиқәыршәареи адгалареи алыршара. Агәра ганы сыҟоуп, Псковтәи аобласти Ареспублика Аԥсни рыбжьаа аусеицура хра злоу аҿиара шаиуо», – ҳәа ажурналистцәа дрыҿцәажәо иҳәеит Владимир Делба.

Уи иара убас адырра ҟаиҵеит аиԥылараҿы Аҟәеи Пскови аҳаиртә еимадара рыбжьаҵара азҵаарагьы ишалацәажәоз.

«Даараӡа ҳақәгәыӷуеит ари апроект анагӡара шзалыршахо. Ҳара ҳганахьала ҩаԥхьа еиҭашьақәҳарӷәӷәоит аимабзиаратә, аиҩызаратә, аҩганк рзы феида злоу аизыҟазаашьақәа рырҿиара ҳшазхиоу», – ҳәа иҳәеит Владимир Делба.

«Псковтәи аобласт - ари жәларбжьаратәи аизыҟазаашьақәа рыҿиара аҿы иҿыцу даҽа етапны иҟалоит», – ҳәа Аԥсни аобласти реизыҟазаашьақәа дрыхцәажәо иҳәеит Псковтәи аобласт агубернатор Михаил Ведерников.

Уи инаҵшьны иазгәеиҭеит Аԥсни Псковтәи аобласти еизааигәазтәуа акыр ишырацәо. Уи аиашахаҵаратә традициақәа, аиашахаҵаратә иԥшьоу аҭыԥқәа, аҿиара иаҿу атуристтә ҭаара апроцесс, уҳәа ахырхарҭақәа роуп.

«Ҳара убасҵәҟьа ҳалацәажәеит аҵарадырра, акультура, аспорт, аекономика, уҳәа ахырхарҭақәа рыла аусеицура азҵаара.  Хара имгакәа, нанҳәамза 25-нӡа Псковтәи аобласти Аԥсни рминистрцәа Реилазаарақәа аусеицура аплан еиқәдыршәоит.  Цәыббрамз 1 иахымгакәа ҳара Авидеоконференцеимадара (ВКС) арежим ала аилатәара мҩаԥаагоит, уаҟа ари аплан шьақәҳарӷәӷәоит, анҩс уи ала ԥхьаҟа аусеицура мҩаԥаагалоит», – ҳәа иҳәеит агубернатор.

Уи иара убас Псковтәи аобласт аҵарадырра Аминистрра, Аԥсны аҵарадырра Аминистрра, Аԥсны аҿари аспорти русқәа рзы Аҳәынҭқарратә Еилакы, азеиԥш план ашьақәырӷәӷәара иазымԥшыкәа русмҩаԥгатәқәа амҩаԥгара иалагоит ҳәа инаҵшьны иазгәеиҭеит.

«Ҳара Аԥсни Псковтәи аобласти русеицура аҟынтәи хра злоу аиҭакрақәа ҳарзыԥшуп», - ҳәа иҳәеит Михаил Ведерников.