«Гхада еиқәыршәоу, насгьы иԥшӡаны ирхиоу ари аҭыжьымҭа, аҭыжьыҩ  ихыԥша еизнарҳауеит, уи имаҵзуреи иҭижтьуа атауарқәеи аџьармыкьаҿы рӡыргареи рыдгалареи акыр иацхраауеит. Уимоу – аҭыжьҩи аклиенттә базеи реимадара алнаршоит, аӡырга аҳасабалагьы уахь иналаҵаны.

Анаплакқәа реихьӡынҵа иахьа – ари Аԥсны атауарқәеи амаҵзурақәеи рдунеи аҿы аусуратә еимадара абжьаҵара, аусеицура аҳәаақәа рырҭбаареи аҩныҵҟатәи аџьармыкьа апозициақәа рырӷәӷәареи алзыршо иҭышәынтәалоу абизнес-еимадаҩ  акәны иҟоуп.

Аизакхьӡынҵа ацхыраарала иарбанызаалак аилак аҩныҵҟатәи аџьармыкьа алахәылацәа рҿаԥхьа адагьы, ареспублика анҭыҵ иҟоу аахәацәа/ахархәаҩцәа рҿаԥхьа ахӡыргаразы  алшара  амоуп, - ҳәа иазгәаҭоуп Ахәаахәҭа-ааглыхратә Палата аофициалтә саит аҿы.

17-тәи аизакхьӡынҵа еиҳа аперспективра злоу аусхкқәа – Аԥсны аинформациатә технологиақәа ирызкуп.  Аҭыжьымҭа иалагалоуп 1165 наплакы, уи иҳаҩсыз ашықәс азы аасҭа  15 рыла еиҳауп. Урҭ рахьынтә 287 – Аԥсны Ахәаахәҭра-ааглыхратә Палата алахәылацәаны иҟоуп. Иарбоу атираж 1000 екземплиар рҟынӡа инаӡоит.

Аизакхьӡынҵа иара убас Ахәаахәҭра-ааглыхратә Палата аофициалтә саит аҿы иҟоу ахатәы електронтә версиагьы амоуп.