Аконкурс аартуп зегьы рзы, уи аҭагылазаашьақәагьы мариоуп:

– Instagram, Telegram рҿы Аминистрра аккаунтқәа шәҽаҵажәҩы;

– шәхатәы видео анышәҵа ахештег #АбхазияВкадре  ацны;

– аноминациа: «Аԥсны аԥсабара» («Природа Абхазии»), мамзаргьы «Аԥсны ахәыҷқәа рыблақәа рыла» («Абхазия глазами детей») ашәырба;

– апост аҿы иашәырба @mintourismra.

Аҳамҭа хадақәа иреиоуп: iPhone 16 Pro, Аԥсны аотельқәеи апансионетқәеи рахь апутиовкақәа, иара убас апартниорцәа рҟынтәи еиуеиԥшым асувенирқәеи аҳамҭақәеи.  

Атуризм аминистр Асҭамыр Логәуа иазгәеиҭеит:

«Ҳара иаҳҭахуп ҳтәыла аԥшӡара ауаа дырбара, аиҳарак уи зынӡа изымбац, мамзаргьы имаҷны избахьоу.  Ҳақәгәыӷуеит иаԥшьаҳгаз аконкурс рхы шаладырхәуа апрофессионалцәа реиԥш, Аԥсны ауааԥсыреи асасцәеи».

Аӡыргара иадҳәалаз аусмҩаԥгатә рхы аладырхәит еицырдыруа аԥснытәи аблогерцәа, урҭ еицырдыруа ажурналист, ауаажәларратә усзуҩ Алеқсандр Малькевич @alexandrmalkevich иҟынтәи ҷыдала авидео-салам роуит.

Аусмҩаԥгатә аҳәаақәа ирҭагӡаны имҩаԥысит ҩ-фильмк рырбара:

– «Аԥсны: баша агәылацәа раасҭа игәакьоу» («Абхазия: роднее, чем просто соседи») – Аԥсни Урыстәылеи ҭоурыхла ирыбжьоу  аимадарақәа, ареспублика ахьыԥшымра, акультуратә ҭынха, аԥшӡара, уҳәа ртәы зҳәо  Александр Малькевич ифильм актәи асериа;

– Аԥсны атуризм Аминистрра аԥшьгарала иаԥҵоу афильм «Мрагыларатәи Аԥсны» («Восточная Абхазия»). 

Абри азы адырра ҟанаҵоит Аԥсны атуризм Аминистрра а-Telegram-канал.