Аганқәа Аԥсны Аҳәынҭқарреи Урыстәылатәи Афедерациеи рыбжьара адипломатиатә еизыҟазаашьақәа рышьақәгылара жәибжь шықәса ахыҵреи адипломаттә еизыҟазаашьақәа рыбжьаҵареи ирзкны еидныҳәалеит. Аԥсни Урыстәылеи русеицура аринахысгьы арӷәӷәареи ганрацәала аҿиареи аҵакы хада азгәарҭеит.

Адәныҟатәи аусқәа рминистр Олег Барцыц иазгәеиҭеит, ари аамҭа иалагӡаны аҩ-ҳәынҭқаррак реизыҟазаашьақәа астратегиатә партниорреи аиҩызареи рыҩаӡара аҟынӡа ишнеиз.

Аиԥылара аҳәаақәа ирҭагӡаны аҳәынҭқаррабжьаратә еизыҟазаашьақәа рзы аԥсуа-аурыс еизыҟазаашьақәа рымшхәаԥштә зҵаарақәеи арегионалтә мшхәаԥштә зҵаарақәеи ирылацәажәан. Уи адагьы, Аԥсны Аҳәынҭқарра адәныҟатәи аусқәа Рминистрреи Урыстәыла иҟоу Аԥсны Ацҳаражәҳәарҭеи Урыстәылатәи Афедерациа адәныҟатәи аусқәа Рминистрра иаҵанакуа ИАР атәылақәа 4-тәи рдепартаменти реимадара азҵаарақәа ирыхәаԥшит.