Бзыԥ аҳабла

Аҳәынҭқарра Ахада  иусуратә ныҟәара хацыркын Бзыԥ аҳабла абжьаратәи ашкол №1 аҭаарала, араҟа имҩаԥысит аспорттә зал ҿыц аартра иазку аныҳәатә усмҩаԥгатә. Аспорттә зал ҿыц дыргылеит Гагра араион Ахадара ахарџь ала. Уажәы ашкол аҿы аҵара рҵоит  518-ҩык ахәыҷқәа.

Аспорттә зал ҿыц аартра иазкыз аныҳәатә церемониа рхы аладырхәит аҵара аминистр Хана Гәынԥҳа, араион ахада Иури Ҳагәышь, Жәлар Реизара-Аапарламент адепутатцәа Алхас Барцыци Ҭемыр Беииеи. Еизаз рҿаԥхьа дықәгыло, Аҳәынҭқарра Ахада аспорти абаҩарҵәыреи рыҿиара еиҵагыло аҿар рааӡараҿы иаҵоу аҵакы ахадара инашьны иазгәеиҭеит. Бадра Гәынба аԥхьаҟа ипатриотхараны иҟоу абиԥарақәа рааӡара иаҿу арҵаҩцәа иҭабуп ҳәа реиҳәеит, иара убас аспорттә обиектқәа реиҭашьақәыргылареи рыргылареи рҿы араион Администрациа алшамҭақәа азгәеиҭеит.

Аҵара аминистр Гәынба Хана илҳәеит аҵаҩцәа ганрацәала рыҿиаразы аспортзал ҿыц аартра акрызҵазкуа шьаҿаны ишыҟоу.   Анаҩс Ахада даҭааит ашкол ахыбраҟны иҟоу Бзыԥ ақыҭа иалҵыз иҭахаз Аԥсадгьыл ахьчаҩцәа ирызку амузеии аетнографиатә музеии. Аҳәынҭқарра Ахада иара убас актәи акласс аҵаҩцәа рурок ахьцоз дыҩнаԥшит, аҵаҩцәа дрыҿцәажәеит. 

Ақалақь Пицунда

Аҳәынҭқарра Ахада Пицунда ақалақь аҿы аа-шықәса иреиҳаны ирзхмыркәшац ахәыҷбаҳча арҽеиратә усурақәа дырццакырц анапынҵа ҟаиҵеит. Ахәыҷбаҳча аиҭашьақәыргылара мҩаԥнагоит Амуниципалтә Унитартә Наплакы «Ақалақь Аргылар-еиҭашьақәыргыларатә Еҿкаара Гәдоуҭа» («ГРСО Гудаута»).

Аҳәынҭқарра Ахада аҵара аминистр Хана Гәынба иарбоу аобиект азхиара гәазҭо, анаҩс уи ахархәарахь аҭаразы аӡбамҭа здызкыло аусуратә комиссиа аԥҵара азы анапынҵа лиҭеит. Иара убас Аҳәынҭқарра Ахада аштатә еихшанҵа аус адулареи ахәыҷбаҳча аперсонал ала аиқәыршәареи рзы анапынҵа ҟаиҵеит. Араиони ақалақьи  Рхадара иарбоу аобиект ахьчареи иааиуа ашықәс азы аартреи алыршаразы анапынҵа аиуит. Анаҩс Бадра Гәынба  иара убас аспорттә комплекс аргылареи Акультура аҩны арҽеиреи ахьымҩаԥысуа аҭыԥқәа гәеиҭеит. Уи зымҽхак дуу аспорттә комплекс ахьыргылахо аплошьадка даҭааит. Апроект аҳәаақәа ирҭагӡаны иазԥхьагәаҭоуп еиуеиԥшым аспорттә хкқәа рзы азыҟаҵаратә залқәа, аицлабрақәа рымҩаԥгаразы азалқәа, абассеин. Иара убас иазԥхьагәаҭоуп  – аицлабрақәа ирылахәхо ахьаанкыло апансион аартразы иажәу ахыбра аиҭашьақәыргылара. Аҳәынҭқарра Ахада инаҵшьны иазгәеиҭеит, ари зымҽхак ҭбаау, убри аан атәылазы акыр аҵак ду змоу  апроект анагӡаразы Аԥсны анапхгара Гагра араион ацхыраара анаҭоит, ахарџь ахәҭк ахахьы иагоит ҳәа инаҵшьны иазгәеиҭеит.

«Ас еиԥш иажәхьоу ахыбрақәа ҳақалақь ԥшӡа Пицунда агәҭаны аҟазаара ахәҭам. Ара иҟазароуп ахәыҷқәеи ақалақь ауааԥсыреи рҽахьазыҟарҵало аспорттә центр», — ҳәа иазгәеиҭеит Бадра Гәынба.

Анаҩс Аҳәынҭқарра Ахада Пицундатәи акультура Аҩны аиҭшьақәыргыларатә усурақәа рцашьа гәеиҭеит. Аусбарҭа адиректор, Аԥсны зҽаԥсазтәыз артист Ҭемыр Агрба, 22 шықәса раԥхьа иҟалаз абылра ашьҭахь, ари ахыбра маҷ-маҷ аилабгара иаҿын, уи аиҭашьақәыргылара алымшо шьаҭанкыла еилабгар ауан ҳәа еиҭеиҳәеит.  Аха араион ахада Иури Ҳагәышь ибзоурала акультура Аҩны аԥсҭазаара ҿыц аиуит. Аиҭашьақәыргылара мҩаԥысуеит араион абиуџьет ахарџь ала. Уажәазы еиҭашьақәыргылоуп афое, агримиортә уадақәа, абиблиотека, аамҭа кьаҿ иалагӡаны асценеи азали реиҭашьақәыргылара нападыркуеит.

Аҳәынҭқарра Ахада акурорттә қалақь азы акырӡа аанагоит ҳаамҭа иақәшәо акультура Аҩны аҟазаара, араҟа рҽазыҟарҵалар рылшоит ахәыҷқәа, араҟа идырбалахоит афильмқәа, иара убас имҩаԥыслоит аиԥыларақәеи аизарақәеи ҳәа инаҵшьны иазгәеиҭеит. Бадра Гәынба аусурақәа зегьы ахаҭабзиара ҳаракны, насгьы иазоужьу аҽҳәарақәа инарықәыршәаны  анагӡаразы абжьгарақәа ҟаиҵеит.

Ақыҭа Лӡаа

Анаҩс Аҳәынҭқарра Ахада Лӡаа ақыҭа даҭааит, араҟа уи акультура Аҩны аргылара шымҩаԥысуа гәеиҭеит. Ахыбра ҿыц ргылахоит  ажәытә хыбра амыцхәрас. Аусурақәа хыркәшахароуп 2026-тәи ашықәс ахыркәшамҭаз.

Аҳәынҭқарра Ахада ақыҭақәа рҿы акультура Аҩнқәа рыргылара аҵак ду шамоу азгәеиҭет. Уи иажәақәа рыла, араҟа ахәыҷқәа жәлар рыкәашарақәа, рашәаҳәара,  амилаҭтә инструментқәа рҵара рҽазыркыр алшоит, уи зегьы ааизакны амилаҭтә культура аиқәырхара иацхраауеит.  

Анаҩс Аҳәынҭқарра Ахада Лӡаа ақыҭашкол даҭааит. Уи арҵаҩцәеи аҵаҩцәеи, иара убас актәи акласс ахь зшьаҿа еихызгаз ахәыҷқәа дрыҿцәажәеит. Бадра Гәынба ахәыҷқәа зегьы шьахәла рхатәы бызшәала ишцәажәо азгәеиҭеит.

«Бзиала ижәбала шәхатәы бызшәа, ишәҵала, уи даараӡа акыр аанагоит»,— ҳәа ахәыҷқәа рахь ихы рханы иҳәеит Аҳәынҭқарра Ахада.

Аҳәынҭқарра Ахада иара убас ашкол аҿы азал хадеи акрыфарҭеи рыргылара шцо гәеиҭеит. Уи ахәыҷқәа рыкрыфаразы ибзиоу аҭагылазаашьақәа шаԥҵатәу азгәеҭеит.

Аҳәынҭқарра Ахада иарҳәеит сынтәа ашкол ахыб аиҭашьақәыргылареи адәахьтәи арԥшӡареи шазԥхьагәаҭоу, анаҩс аҩныҵҟатәи аҩычаратә усурақәа ишрылаго.

Бадра Гәынба араион ахадареи аргылаҩцәеи рахь ихы рханы иазԥхьагәаҭоу аусурақәа зегьы ахаҭабзиара акыр иацклаԥшырц азы анапынҵа ҟаиҵеит.

«Араҟа ҳхәыҷқәа аҵара рҵоит, инагӡахо аусурақәа рхаҭабзиара иадҳәалахоит урҭ анаҩс рҵаратә процесс аманшәалареи ашәарҭадареи», — ҳәа иҳәеит Аҳәынҭқарра Ахада.

Ақалақь Гагра

Гагра ақалақь аҿы Аҳәынҭқарра Ахада даҭааит араионтә санитар-епидемиологиатә Станциа ахыбра ҿыц. Уаанӡа ари аусбарҭа иажәыз, аусуразы иманшәаламыз, аилабгара иаҿыз ахыбраҿы иҟан. Шьаҭанкыла аиҭашьақәыргылара ашьҭахь уи рҿыцын: амаҵуратә кабинетқәа рхиан, ахимиатәи абактериологиатәи алабараториақәа аартын. Аусбарҭа аҿы аӡы анализ мҩаԥыргоит, афатә аалыҵқәа гәарҭоит, иара убас аҿыкчымазарақәа рдиагностика ҟарҵоит, убас ала есышықәса зқьҩык инареиҳаны ауаа ацхыраара рырҭоит.  

Анаҩс Аҳәынҭқарра Ахада Абазгаа рымҩала зеиҭашьақәыргылара иаҿу ахәыҷбаҳча даҭааит. Ари ахәыҷбаҳча ахыбра Гагра араион Ахадара абаланс ахь ирхынҳәын, уажәы уи араион ахарџь ала еиҭашьақәдыргылоит. Аусурақәа ахыркәшарахь инеиуеит. 100-ҩык рҟынӡа ахәыҷқәа здызкылар алшо ари ахәыҷбаҳча ахәыҟаҵарҭазы амаругақәеи егьырҭ аиқәыршәагақәеи рыла аиқәыршәара мҩаԥысуеит. Аҳәынҭқарра Ахада Ашықәс Ҿыц аламҭалазы аусурақәа хдыркәшарц азы адҵа ҟаиҵеит.

Аҳәынҭқарра Ахада асоциалтә ҵакы змоу аобиектқәа реиҭашьақәыргылара зхы алазырхәуа зегьы иҭабуп ҳәа реиҳәеит, уи Гагра араион ахада хаҭала аусурақәа ахылаԥшра аиҭаларц анапынҵа ииҭеит... Президент поблагодарил всех, кто участвует в ремонте социальных объектов, и поручил главе Гагрского района держать их под личным контролем..

Источник: Здание было возвращено на баланс администрации Гагрского района, и теперь его ремонтируют за счёт районных средств. Работы находятся на завершающей стадии. Детский сад, который сможет принять до 100 детей, уже оснащают оборудованием для пищеблока и другим инвентарём. Поставлена задача завершить все работы к Новому году.

Гәынба Гагра араион асоциалтәи аспорттәи аргыларақәа дырҭааит

Лӡаа ақыҭан аҳәынҭқарра ахада Акультура аҩни, азал хадеи акрыфарҭеи змоу ашколи рыргылара шцо гәеиҭеит, аусура ахаҭабзиареи амилаҭтә культура аиқәырхареи аҵак ду шрымоу азгәеиҭеит.

Гагра ақалақь аҿы аҳәынҭқарра ахада араионтә санепидемиологиатә станциа еиҭашьақәыргылоу ахыбреи

https://apsnypress.info/ru/home/novosti/item/17208-badra-gunba-proinspektiroval-stroitelnye-i-remontnye-obekty-v-gagrskom-rajone.

© АПСНЫПРЕСС.