«Ҳәарада, уаанӡа еиԥш уажәгьы, ҳара ҳзы акыр иҵару проблеманы иҟоуп аенергетика аусхкы. Аҳәынҭқарра Ахада Бадра Гәынба ила атәыла анапхгара аҿаԥхьа аенергетикатә усхкы аҭышәынтәалара иазырханы конкретла адҵақәа ықәыргылоуп. Иахьа инаркны иааиуа аӡынтәи аамҭахәҭазы адифицит армаҷразы ауснагӡатәқәа мҩаԥысуеит, сара агәра ганы сыҟоуп, алҵшәа бзиақәа шҳауо. Ҟалашьа амаӡам, ҳаргьы иалҳаршаӡом атәылаҿы аенергетикатә коллапс ашьақәыргылара, избан акәзар, уи атәыла азы, ауааԥсыра рзы аԥсҭазаара иахыҵхырҭоуп, ари аекономикатәи асоциалтәи аусхкқәа рҿы акырӡа зҵазкуа аспектны иҟоуп», - ҳәа Владимир Делба иажәақәа аанагоит ТАСС.
Аҵыхәтәантәи ашықәсқәа рзы Аԥсны есӡынра Егрытәи Аӡфымцатә Станциа иаҵанакуа Џьвартәи аӡеизакырҭа аҿы аӡы аҩаӡара иахьагхо инамаданы аенергиа азымхара цәырҵуеит. Ареспублика аҿы аиҳарак аӡын аамҭеихшала афымцамч арцәара арежим алагалахоит.
