Аԥсны адәныҟаполитикатә хылаԥшырҭа аҿы Қырҭтәыла ганкахьалатәи апозициа ақәҿиара аиуразы жәларбжьаратәи аинститутқәа рхы ишадырхәо умбар залшаӡом ҳәа аҳәамҭа ҟарҵеит.

«Даҽазныкгьы ҳара иаабоит Қырҭтәыла ганкахьалатәи апозициа ақәҿиара аиуразы жәларбжьаратәи аинститутқәа рхы ишадырхәо. Арезолиуциаҿы ахархәара змоу атерминологиа – «ампыҵахалара», «закәаншьаҭадатәи арратә хылаԥшра» — зынӡаскгьы аҵабырг иадҳәалам, аҭоурыхтә, аполитикатә, азакәантә ҭагылазаашьа ӷәӷәала еицаркуеит.

Аԥсны Аҳәынҭқарра исуверентәу ҳәынҭқарроуп, ҳажәлар ргәаҳәара хақәиҭрала аарԥшра иабзоураны ахьыԥшымразы ирымоу азин ишьақәнарӷәӷәеит. Аҳәынҭқаррабжьаратәи аиқәшаҳаҭрақәа рышьаҭала ҳшәарҭадара ахәдықәҵаҩык аҳасаб ала иқәгыло, Аԥсны изакәантәу адгылара азҭо Урыстәылатәи Афедерациа жәларбжьаратәи азин иазханаҵаз субиектуп. “Ауаҩы изинқәа реилагара” азы агәҭынчымреи «жәларбжьаратәи ахылаԥшыҩцәа рнеира алыршара» азы адҵақәеи аполитикатә қәымчра иамыруганы иҟоуп. Ҳара аиҿцәажәара ҳазхиоуп, аха амч ахархәара мап ацәкразы азакәантә ҭакԥхықәра зду аиқәшаҳаҭра анапаҵыҩра мап ацәкрагьы уахь иналаҵаны Қырҭтәыла имҩаԥнаго агрессивтә политика зымбошәа ҟазҵо иҳадырҵо ҟаҵо акәымкәа, аиҟарареи ҳсуверенитет аҳаҭырқәҵареи рышьаҭала мацара ала», – ҳәа иазгәаҭоуп аҳәамҭа аҿы.

Одиссеи Бигәаа «ауаҩы изинқәа реилагара» аганахьала агәҭынчымра аарԥшреи «жәларбжьаратәи анаԥшыҩцәа рынашьҭразы» адҵақәа рықәыргылреи аполитикатә қәыӷәӷәара аинструментны иҟоуп ҳәа инаҵшьны иазгәеиҭеит. Аԥсны адиалог азы иаартуп, аха уи Қырҭтәыла имҩаԥнаго агрессивтә политика, уи амч ахархәара мап ацәкра азы аиуристтә ҭакԥхықәра азԥхьагәазҭо аиқәшаҳаҭра анапаҵыҩра мап ацәкра уахь иналаҵаны,  аганахьала зыла хызҩо «рабжьгарала» акәымкәа, азинеиҟарареи аҳаҭыреиқәҵареи рышьаҭала мацара ауп ишзалыршахо.