Аҟәа. Жьҭаарамза 14, 2025 шықәса. Аԥсныпресс. Аҳәынҭқарра Ахада Бадра Гәынба Очамчыра араион Кәтол ақыҭа Ахадара ахыбра аҿы аиҭашьақәыргыларатә усурақәа рцашьа гәеиҭеит, ҳәа адырра ҟанаҵоит Аҳәынҭқарра Ахада ипресс-маҵзура.
Ахыбраҿы аиҭашьақәыргыларатә усурақәа анхыркәшахалак ашьҭахь иҟалоит ақыҭа ахадара, акттә зал, Аԥсны жәлар Рџьынџьтәылатәи еибашьра аветеранцәа рзал, аҽааӡареи аҿыбӷаҟазаратә спорти рмузеи.
Ақыҭа ахада иҟаиҵаз адыррақәа рыла, аиҭашьақәыргыларатә усурақәа рхыркәшара азԥхьагәаҭоуп мызки бжаки рышьҭахь.
Бадра Гәынба иара убас машәырла иҭахаз Жәлар Реизара-Апарламент адепутат Вахтанг Гәаланӡиа ҳаҭырла дигәалаиршәеит.
Анаҩс Аҳәынҭқарра Ахада ақыҭашкол даҭааит, арҵаҩцәа дрыҿцәажәеит, аҵара апроцесс амҩаԥгаразы араҟа иаԥҵоу аҭагылазаашьақәа дрызҵааит, ашколхәыҷқәа драцәажәеит.
