Аԥсны адомино Афедерациа апрезидент Ҭемыр Лакербаиа ԥхынгәымза 2025 шықәсазы апрофессионалтә домино азы Аԥсны еизгоу акоманда иаарту жәларбжьаратәи атурнир Mexico-2025 аҿы араӡнытә аԥхьахә агеит ҳәа иазгәеиҭеит. Усҟан акоманда аилазаараҿы иҟан ахәмарҩцәа Саид Ашәба, Инал Какоба, Алмас Габуниеи Инал Аргәыни. Есышықәса 500-ҩык инареиҳаны алахәылацәа зыхьӡ нагоу ачемпионат аҿы еизоит, араҟа еиԥылоит иԥхьагылоу ачемпионцәеи аҟыбаҩ злоу аспортсменцәеи Аԥснытәи аспортсменцәа иааиԥмырҟьаӡакәа зыҩаӡара ҳараку апрофессионалра аадырԥшуеит, аихьӡара дуқәа роуеит.
Урыстәылазегьтәи ауаажәларратә еиҿкаара «Российская федерация домино» апрезидент Борис Борзов убасҵәҟьа аԥснытәи аспортсменцәа рыҩаӡара иҳараку ахәшьара аиҭеит. Уи инаҵшьны иазгәеит, аԥснытәи ахәмарыҩцәа хра злоу аус рыцура абар шьҭа акыр шықәса инеиԥынкыланы имҩаԥысуеит ҳәа инаҵшьны иазгәеиҭеит.
«Ҳабжьара аиашьаратә еизыҟазаашьақәа шьақәгыланы иҟоуп. Атурнир мҩаԥго иахьа ҳара абар шьҭа акыр шықәса ишьақәгыланы иҳамоу хра злоу атрадициақәа ирыцаҳҵоит. А.М. Габуниа Аԥсны адомино Афедерациа Раԥхьатәи апрезидентс даныҟала аамҭа инаркны аспорттәи аиҩызаратәи аимадарақәа рырӷәӷәара иацхраауа наҟ-ааҟ аиҭанеииааирақәа хацыркхеит», – ҳәа иҳәеит Борис Борзов.
Уи иара убас адомино ахәмарра ажәларқәа рыбжьара аиҩызара арӷәӷәоит ҳәа агәрагара ааирԥшит, ҳаамҭазы адунеи аҿы, ахәыҷқәа еиҳа-еиҳа агадџьетқәа рыла раамҭа анырхырго, урҭ авиртуалтә дунеи аҟынтәи раԥҟьара, уи амыцхәрас урҭ рымчи рыхшыҩи хра злоу аус ахь азырхара ҷыдала аҵак ду амоуп ҳәа инаҵшьны иазгәеиҭеит. Иарбоу аконтекст аҿы аҿар аус рыдулара ҷыдала аҵакы духоит.
«Ҳара иаабоит аҿар рҽазҵәылхны хра злоу аусқәа рнапы шаларкуа, аматематика аҿы рдыррақәа иацырҵоит, рҭаацәа дыргәырӷьоит иагьдыршанхоит реихьӡарақәа рыла. Ишиашоу аимадара дара агадџьетқәа рахь акәымкәа даҽаџьара, иаагозар аспорт ахь рхы архара иацхраауеит. Ахәыҷқәа аус ахьрыдаауло ҳара иаабоит урҭ рпотенциал, ауаҩ бзиақәа рааӡара ҳҽазаҳшәоит. Ҳара ҳусура аиҩызареи аилибакаареи рырӷәӷәара иацхраауеит», - ҳәа иажәа хыркәшо иҳәеит иара.
Аԥсны адомино Афедерациа раԥхьатәи апрезидент А.М. Габуниа игәалашәара иазку апрофессионалтә домино азы Жәларбжьаратәи атурнир мҩаԥгахоит абҵарамза 21 – 23 рзы Афон Ҿыц ақалақь аҿы. Сынтәа аицлабрақәа сасны иаҭааит адомино Жәларбжьаратәи афедерациа апрезидент Мануель Окендо Еиду Америкатәи Аштатқәа (ЕАА), Венесуела адомино Афедерациа апрезидент Ефраин Веласкес, Доминикантәи адомино Афедерациа апрезидент Хуакин Мартинес, Урыстәыла адомино Афедерациа апрезидент Борис Борзов.
