Аԥсны Аҳәынҭқарра Аконституциа ианыԥшуеит аҭоурыхтә традициақәа, хра злоу акультуратә традициақәа, ажәлар ззықәԥо ахықәкы хадақәа – аҩныҵҟатә гәҭынчреи, ауаҩы изинқәеи, ихақәиҭрақәеи, атәылауаҩратә ҭынчреи аҳәоуеиқәшәареи, уи уасхырс иҟалеит ҳара иахьатәи аҳаԥсҭазаареи уаҵәтәи ҳԥеиԥши рзы.

Аԥсны Аҳәынҭқарра жәлар рхатәҳәаақәҵаратә зин инақәыршәаны, ҭоурыхла ишьақәгылаз, суверентә, демократиатә, зинтә ҳәынҭқарраны ирылазҳәаз Аконституциа рыдыркылеит 1994 шықәса абҵарамза 26 рзы, Владислав Арӡынба напхгара зиҭоз Аҧсны Аҳәынҭқарра Иреиҳаӡоу Ахеилак асессиаҟны. 1999 шықәса жьҭаарамза 3 рзы иахьа аус зуа Аконституциа Аԥсны Аҳәынҭқарра атәылауаа жәларызегьтәи бжьыҭарала иақәшаҳаҭхеит.

Аконституциа 1992-1993 шш. Аԥсны Аџьынџьтәылатә еибашьраҟны иаҳгаз аиааира алҵшәақәа шьақәнарӷәӷәеит. Аԥсны Аҳәынҭқарра исуверентәу, изинтәу ҳәынҭқарраны ирылазҳәаз Аконституциа ҳажәлар ртәылауаҩратә зинқәеи рхақәиҭрақәеи, уи адгьылҵакыра акзаареи, акьымсреи рзы хәдықәҵара зуа акәны иҟалеит.

Иахьа Аԥсны Аҳәынҭқарра жәларбжьаратәи апозициақәа арӷәӷәоит, иамоу аҩныҵҟатәи алшарақәа рырҿиара иаҿуп. Ҳара иаҳуалуп Аконституциаҟны иарбоу анормақәа зегьы рдырра, рықәныҟәара, аекономикеи асоциалтә ҟәшеи ҭышәынтәаланы рыҿиара, аҳәынҭқарраҟны иҵоуроу аиҭакрақәа рымҩаԥгара ацхраара. Аамҭа аҽаԥсахуеит, Аконституциа ауаажәларра рыԥсҭазаараҟны имҩаԥысуа аиҭакрақәа аныԥшуазароуп. Аԥсны Жәлар Реизара – Апарламенти, анагӡаратәи, аӡбаратәи мчхареи, ауаажәларреи еидгыланы абри аганахьала аусурақәа мҩаԥыргоит.  Ҳаҭыр зқәу ҳауаажәлар, ҳҳәынҭқарразы акрызҵазкуа амш шәыдныҳәало, гәык-ԥсык ала зегьы ишәзеиӷьасшьарц сҭахуп аизҳазыӷьара, ҳаԥсадгьыл аҿиара, аизҳара иазку ахықәкқәа рынагӡараҟны аихьӡара ҿыцқәа!