Аполитикатә партиа «Аԥсны жәлар ракзаара Афорум» иҟанаҵо ахәшьарала, уаанӡа иҟаз ахадарала ирыдкылаз аӡбамҭақәа аҳәынҭқарратә институтқәа рҭышәынтәалареи Аԥсны анҭыҵынтәи адкылареи хра злам анырра арҭеит.  Аслан Барцыц ареспублика аҿы урыстәылаҿагыларатәи ҭырқәтәыла адцәыларатәи амчқәа ыҟоуп ҳәа атәыла аҿы ирылаҵәаз ацәажәарақәа ауаажәларра рполиаризациа арӷәӷәеит, Урыстәылеи Аԥсни реизыҟазаашьақәа ирԥырхагахеит ҳәа инаҵшьны иазгәеиҭеит.

Аекономикатә блок абылтәы џьармыкьа аҿы иуадаҩу аҭагылазаашьеи атуристтә усхкы аҿы ицәырҵыз ауадаҩрақәеи абизнес ду алалара уи ианаҭаз анырреи, иара убас иӡбамкәа иаанханы иҟоу акадастр иадҳәалоу азҵаарақәа  ирыдҳәалоу ашәарҭарақәа ирызкын.

Ажәахәҟаҵаҩы ауаажәларра зегьы рпозициа ҳасаб азуны аӡбамҭақәа рыдкылара амеханизм аиӷьтәра шхымԥадатәиу азгәеиҭеит. Уи азы акыр аҵанакуеит еиуеиԥшым аполитикатә мчрақәа аҳәынҭқарратә амассатә информациа ахархәагақәа рҟынӡа рынаӡаразы еиҟароу алшарақәа раԥҵара, избан акәзар, убас еиԥш алшарақәа рыҟамзаара аилибамкаарақәа, аиҿагыларақәа реизҳара цәырнагоит.

Иқәгылара хыркәшо, Аслан Барцыц, атәыла ԥхьаҟатәи аҿиаразы ауаажәларратә ҭышәынтәалареи аполитика ихадоу ахырхарҭақәа рыла  еиқәшаҳаҭрала ирыдыркыло аӡбамҭақәеи хымԥадатәуп ҳәа инаҵшьны иазгәеиҭеит.

Аизара Ду аусура аихшьаалақәа рыла арезолиуциа рыдыркылеит.

«Аизара Ду ҭакԥхықәрала иазгәанаҭоит, аԥснытәи аполитикатә ҵакыра аҿы ахаангьы иҟаӡамызт иагьыҟам Урыстәылеи Аԥсни рыбжьара астратегиатә усеицура иаҿагыло амчқәа. Ҳара аполициатә методқәа рыла анапхгара алагалара, даҽакала ихәыцуа  рахьырхәразы рышьҭазаара, атәылауаа рзы «ашәҟәы еиқәаҵәақәа» реиқәыршәара, апарламенттә комиссиа ала инҭырҳәцааны аҭҵаара зҭаху аполитикатә цәгьоураны ҳахәаԥшуеит», - ҳәа иазгәаҭоуп арезолиуциа аҿы.  

Аԥсны жәлар ракзаара Афорум Аизара Ду атәылауаа рганахьала аполитикатә репрессиақәеи атәыла асуверенитет армаҷреи ҟалашьа змам усны иахәаԥшуеит.                    

Аԥсны жәлар ракзаара Афорум дҵаны иқәнаргылоит аопозициатә партиақәеи ауаажәларратә еиҿкаарақәеи Аԥсны аҳәынҭқарратә радиоеилахәыра аефир аҟынӡа инагӡаны анаӡара аиҭашьақәыргылара.  

Аԥсны жәлар ракзаара Афорум аҵыхәтәантәи ашықәсқәа рзы иҟаз аекономикатә политика хра злам ахҟьаԥҟьақәа рганахьала агәҭынчымра аанарԥшуеит:

- идуу анҭыҵтәи аструктурақәа рыла амилаҭтә бизнес анаскьагара;

- абылтәы џьармыкьа ихьыԥшым аоператорцәа рықәыӷәӷәара;

- «Еиҭамҵуа амазара акадастр азы» азакәан иаҵоу асистематә кризис ашәарҭарақәа.

Аоппозициатә партиа асоциалтә дестабилизациа, ажәлар рыпротестқәеи амчра аинститутқәа рахь агәрамгареи цәырнагар зылшо аекономикатә ӡбамҭақәа реиҭахәаԥшразы иқәгылоит.

Аԥсны жәлар ракзаара Афорум аҭоурых аҿы иуадаҩыз аамҭақәа рзы реалла Аԥсны адгылареи ацхыраареи азҭаз, адгылаҩ заҵәны иҟоу –Урыстәылатәи Афедерациеи Аԥсни ганрацәадатәи аусеицура азы астратегиатә курс аицамкра ишадгыло шьақәнарӷәӷәоит.

Аԥсны жәлар ракзаара Афорум «анҭыҵтәи ашәарҭарақәеи аҩныҵҟатәи ауадаҩрақәеи рыҟазаараан ажәлар ракзаара — ари баша лозунгны иҟаӡам, ари зегьы ҳзы аамҭа иқәнаргыло хыдҵоуп. Акзаара ауп Ареспублика Аԥсны аҳәынҭқарразаареи асуверенитети абызшәеи акультуреи рыхьчара зылшо», – ҳәа иазгәаҭоуп арезолиуциа атекст аҟны.

Аԥсны жәлар ракзаара Афорум Аизара Ду даара ихымԥадатәиуп ҳәа иаԥхьаӡоит, насгьы адгылара анаҭоит ҳаамҭазтәи аԥсуа ҳәынҭқарра ашьаҭаркҩы Владислав Григори-иԥа Арӡынба ихьӡ зху аҳәынҭқарразаара ашьаҭақәа рыхьчаразы азеиԥшмилаҭтә еиҿкаара аԥшьгара.