«Ари азҵаара Гагра араион Ахадара ахылаԥшра аҵаҟа иҟоуп», - ҳәа иҳәеит Адамыр Цышба.

Евдокиа Котлиарова лԥа, Владимир Котлиаров уажәы дара ргәылацәа рҿы аамҭала ахыҵакырҭа рыԥшааит ҳәа иҳәеит. «Ҳгәылацәа аамҭала ҳрыдыркылеит. Ҳара даҳҭааит ақалақьтә нхамҩа аусбарҭа аиҳабы ихаҭыԥуаҩ Алиас Ажьиба, уи иахәҭоу ашәарақәа ҟаиҵеит», – ҳәа иҳәеит Владимир Котлиаров.  

Аџьынџьтәылатәи еибашьра Дуӡӡа аветеран Евдокиа Котлиарова Гагра ақалақь аҿы иҟоу луада амца акит ажьырныҳәамза 11 рзы. Гагра ақалақь, Абазгаа рымҩала игылоу хә-еихагылакны иҟоу аҩны аҿы иҟалаз амцакра аанкылан, аиқәырхаҩцәа атәанчаҩԥҳәыси агәылара иҟаз ауадақәа ҩба рҿы инхоз ауааи ревакуациа мҩаԥыргеит. Урҭ рыбжьара иҟан ҩыџьа ахәыҷқәагьы.  

Аҳәынҭқарра Ахада Бадра Гәынба аветеран аамҭала дахьынхаша ала леиқәыршәара, иара убас луада араион абиуџьет ахарџь ала аиҭашьақәыргыларазы адҵа ҟаиҵеит.