Гәынба инаҵшьны иазгәеиҭеит Урыстәылатәи Афедерациеи Аԥсни реизыҟазаашьақәа рыҿиара ихадоу аҵакы шамоу. Иара убасгьы иҳәеит Урыстәылатәи Афедерациа арегионқәа аус рыцура ихадоу акакәны дшахәаԥшуа.

Аҳәынҭқарра Ахада инаҵшьны иазгәеиҭеит Санкт-Петербурги Аԥсни рекономикатә еимадарақәеи реизыҟазаашьақәеи иҭышәынтәалоу аҿиара бзиа шрымоу.

Атәыла ахада иҳәеит Аԥсны Аҳәынҭқарреи Санкт-Петербург анапхгараеи рыбжьара аиқәышаҳаҭра апроект ҵыԥх уажәааны рнапы шаҵарҩыз. Бадра Гәынба инаҵшьны иазгәеиҭеит аԥсуа ган шазыхиоу аинырра аҿиара бзиа азҭо аиқәышаҳаҭрақәа рыбжьаҵара.

Аҳәынҭқарра ахада ахәшьара ҳаракы аиҭеит Санкт-Петербурги Аҟәеи рыбжьара ҵыԥх ихацыркыз аҳаиреимадара.

Бадра Гәынба Петербург анапхгара ҭабуп ҳәа реҳәеит иаадырԥшуа адгыларазы. Иазгәеиҭеит ареспубликаҿы Санкт-Петербург ауааԥсыреи ақалақь аиҳабыреи рганахьала аԥхарратә еизыҟазаашьа ахә ҳаракны ишыршьо. Атәыла ахада иҭабуп ҳәа иеиҳәеит Санкт-Петербург агубернатор Александр Беглов Аҟәа аҿиаразы иҟаиҵо ацхырааразы.

Санкт-Петербург агубернатор ихаҭыԥуаҩ Кирилл Полиаков аделегациа ԥхаррала иахьрыдыркылаз азы иҭабуп ҳәа реиҳәеит. Дазааҭгылеит агубернатор Александр Беглов иҟаиҵаз ажәалагала, уи инақәыршәаны иазԥхьагәаҭоуп рашәарамза алагамҭазы Петербургтәи жәларбжьаратәи аекономикатә форум аҿы аиқәышаҳаҭра рыбжьарҵарц.
Иара аҳаиреимадара алҵшәа бзиақәа азгәеиҭеит, иааиԥмырҟьаӡакәа ареисқәа бжьарҵар шауа атәы иҳәеит.

Санкт-Петербург Аҟәа техникала ацхыраара анаҭоит, аҵареи акультуреи русхк аҟны аусеицура иацнаҵоит. Аԥснытәи амедалистцәа аныҳәа «Аԥра ҟаԥшьқәа» ахь инаԥхьоуп, иазыԥхьагәаҭоуп арра-патриоттә хәмарра «Зарница» алахәхара. Иара убасгьы иҭабуп ҳәа реиҳәеит Санкт-Петербург ахәыҷтәы усҳәарҭақәа рахь инашьҭыз аԥсуа мандаринақәеи апатырқалқәеи рзы.