Бадра Гәынба Урыстәыла ахада Владимир Путин иҭабуп ҳәа иеиҳәеит Аҟәатәи аҳаирбаӷәаза аартреи Аԥсны аҿиараҿы иҟаиҵо ацхраареи рзы.
«Ари ииашаҵәҟьаны иҿыцу етапуп, Урыстәылатәи Афедерациа ахада Владимир Владимир-иԥа Путин ибзоурала ҳтәыла аҿиара аера ҿыц иануп. Издыруеит шәара ишәыцны хыԥхьаӡара рацәала аекспертцәа, абизнесуаа, арегионқәа рнапхгаҩцәа шааз. Арҭ аимадарақәа ҳтәылақәа реизыҟазаашьа арӷәӷәаразы акырӡа рыҵанакуеит», - иҳәеит Бадра Гәынба.
Аиԥылараҿы иазааҭгылеит Аԥсни Урыстәылеи русеицура ахырхарҭа хадақәа, асоциалтә, аекономикатә, аинфраструктуратә усхкқәа рҟны еицырзеиԥшу апроектқәа рынагӡарагьы налаҵаны. Ҩ-ганктәи аизыҟазаашьақәа динамикала рыҿиара шымҩаԥысуа шьақәнарӷәӷәоит аҵыхәтәантәи ашықәсқәа рзы иҳауа алҵшәақәа.
«Владимир Владимир-иԥа ахылаԥшра аиҭоит Урыстәылеи Аԥсни русеицура аҿиара. Шықәсык ҵит шәара Аԥсны хадас шәалырхижьҭеи. Уи иалагӡаны зҽызыԥсахыз даара ирацәоуп, аха макьана амҩа ду ҳаԥхьаҟа ишьҭоуп. Зымҽхак ҭбаау аиҭакрақәа уажәоуп ианалаго», - ҳәа аҳәамҭа ҟаиҵеит аиԥылараҿы Сергеи Кириенко.
Аганқәа агәрагара аадырԥшит арҭ амшқәа рзы Аԥсны имҩаԥысуа Жәларбжьаратәи аекономикатә форум алҵшәақәа унырыртә ишыҟало азы.
