Гәынба инаҵшьны иазгәеиҭеит ҩ-республикак реимадара аҭоурых ҵаула шамоу.

«Ҟабарда-Балкариеи Аԥсны Аҳәынҭқарреи реизыҟазаашьа шәышықәсала ишьақәгылон. Урҭ рыхә ҳаракны иаҳшьоит. Сара раԥхьа иргыланы иазгәасҭарц сҭахуп Аԥсны Аџьынџьтәылатә еибашьраан хатәгәаԥхарала еибашьуаз ҳашьцәа. Урҭ рыцхыраара ҳгәы шьҭнахит, аӷа иҿаԥхьа ҳхала ҳшыҟам ҳнарбеит», - иҳәеит Гәынба.

Аԥсны ахада иара убасгьы иазгәеиҭеит Ҟабарда-Балкариа Аԥсни рыбжьара ԥхьаҟатәи аусеицура ахырхарҭа хадақәа. «Ҳара аекономикатә еизыҟазаашьақәа рышьақәыргылара иазырхоу аетап ҿыц ахь ҳаиасуеит. Сгәыӷуеит урҭ рырҿиаразы алшара ҳауп ҳәа.

Ҳара ҳзы акрызҵазкуа хырхарҭаны иҟоуп аиҭанеиааира арманшәалара. Иаҳҭахуп Ҟабардантәи ҳашьцәа еиҳа лассы-лассы иааларц. Ҳтәыла ашәқәеи ҳтәылауаа рыгәқәеи еснагь шәара шәзы иаартуп», - иҳәеит Бадра Гәынба.

Казбек Коков иакәзар, ааԥхьаразы иҭабуп ҳәа реиҳәеит, Аԥсны аҿиара ахәшьара ҳаракы аиҭеит.