Аусмҩаԥгатә еиҿыркааит аурыс бызшәеи азеиԥш бызшәадырреи ркафедреи аурыси аҳәаанырцәтәи алитературақәа рҭоурых акафедреи.

Аурыси аҳәаанырцәтәи алитературақәа рҭоурых акафедра аиҳабы Наҭелла Бахиа абитуриентцәа рахь ааԥхьара ҟалҵеит ԥхьаҟа афакультет иастудентцәахарц азы.

«Ҳаамҭазы агуманитартә ҵара зегь реиҳа зыхә ҳараку, ихәарҭақәоу иреиуоуп. Иԥсабаратәым аинтеллект зус аҿы зыҩаӡара ҳараку аспециалист ахаангьы дзаԥсахӡом. Алитература аганқәа реилкаара, ажәа ҟазарыла аус адулашьа уҳәа ауниверситет ишәынаҭо рацәоуп», – лҳәеит Бахиа.

Аурыси аҳәаанырцәтәи алитературақәа рҭоурых акафедра адоцент Стелла Бебиа авикторина алахәылацәа ауниверситет длырбеит. Аекскурсиа амҩаԥгараан аиҳабыратә классқәа рҵаҩцәа идыбан абиблиотека, ахолл, аудиториақәа, адунеизегьтәи аҿар рфестиваль адирекциа ахаҭарнакра иатәу акампус.

Анаҩс атәыла еиуеиԥшым араионқәа рҟынтәи иааз ашколхәыҷқәа узырхәыцша авикторина рхы аладырхәит. Акафедрақәа иаздырхиеит азҿлымҳара змоу азҵаарақәа аурыс жәаԥҟақәеи ацуфарақәеи ирылхны. Афольклор адырразы еицлабуаз алахәылацәа ф-гәыԥкны рҽыршеит, урҭ рдыррақәеи рхәыцреи аадырԥшуан.

Авикторина анхыркәшаха алахәылацәа зегьы асертификатқәеи агәалашәаратә ҳамҭақәеи роуит. Ари аусмҩаԥгатә ашколхәыҷқәа рдыррақәа ргәаҭара адагьы агуманитартә ҭҵаарадыррақәа рахь ирымоу азҿлымҳара шьҭнахит. Иара убас Аԥснытәи аҳәынҭқарратә университет иҭаларац зҭаху рзы акрызҵазкуа шьаҿаны иҟалеит.