Ақалақь-фырхаҵа Тҟәарчал шьаҭаркуижьҭеи 84 шықәса аҵра азгәанаҭоит. Акрызҵазкуа арыцхә инамаданы ақалақь аҿы аныҳәатәи агәалашәаратәи усмҩаԥгатәқәа мҩаԥысуеит.
Аныҳәа иалагеит ашәҭшьыҵәрақәа рышьҭаҵара ацеремониала, аԥыза-министр Владимир Делба, атәыла анапхгара, Жәлар Реизара адепутатцәа, Тҟәарчал араион ахада Герман Каҷараа, Смоленсктәи атәылаҿацә Адума акомиссиа ахантәаҩы Михаил Лосенко зхадараҿы дыҟоу аделегациа, Аԥсны ақалақьқәеи араионқәеи рхадацәа, ауаажәларра, аусмҩаԥгатә алахәылацәа Аԥсны раԥхьатәи Ахада Владислав Арӡынбеи Аԥсны Жәлар Рџьынџьтәылатә еибашьраҿы иҭахаз аԥсадгьыл ахьчаҩцәеи ргәаладыршәеит.
Тҟәарчал шьаҭаркын 1942 шықәсазы арацәа ааглыхра аиндустриатә центр аҳасабала. Атәыла ҳаамҭазтәи аҭоурых аҿы Тҟәарчал, ақалақь-фырхаҵа ҳәа ахьӡ аиуит 1992-1993 шш. ауааԥсыра рычҳареи ргәымшәареи иабзоураны. Аныҳәатә программа шьақәгылоуп еиуеиԥшым ақәгыларақәа рыла.
