Асолистцәа: Илиа Легатов, Ельнара Караханова, Кристина Ешба, Витторио Ԥлиа, Леон Барас, Мариа Емилиа Терзиан-Ҳагба, Асҭанда Џьыкырба.

Ахәылԥаз аартуа амҩаԥгаҩ илҳәеит иахьатәи агәырӷьара афырхаҵа хада — амузыкатә коллектив ҿыц, Афон Ҿыцтәи афестиваль Жәларбжьаратәи аҿартә хор шакәу. Иаԥиҵеит, аколлектив дахагылеит Барас Кәыџба. Барас Кәыџба Пицундатәии Афон Ҿыцтәии афестивальқәа рсахьаркыратә напхгаҩы, рдиректор, Аԥсны Аҳәынҭқарратә хортә капелла адирижиор, П.И. Чаиковски ихьӡ зху Москватәи аҳәынҭқарратә консерваториа аушьҭымҭа иоуп.

Барас Кәыџба иазгәеиҭеит ахор ишалахәу хә-тәылак рхаҭарнакцәа (Урыстәыла, Китаи, Беларуссиа, Ҟазахсҭан, Аԥсны.) Ахор аԥҵара аидеиа Пицундатәи афестиваль аҭоурых иадҳәалоуп.

«2023 шықәса инаркны уа афестиваль мҩаԥаагоит. Ҳтәылазы уи акырӡа аҵанакуеит, ҳхы ӡыраҳгалароуп. Сара агәра ганы сыҟоуп аҟазара, аҭоурых, аҵаралашара рыбзоурала ишҳалшо уажәы иҟоу ауадаҩрақәа зегьы риааира. Убри аҟнытә аҟазара амч агәра згоит. Сгәы иаанагоит ажәларқәа амузыка иабзоураны еиҳа еиӷьны еилибакаауеит ҳәа. Уи азы иаԥысҵеит еиуеиԥшым атәылақәа рхаҭарнакцәа еидызкыло аколлектив. Уи шьахәуп ҳәа исыԥхьаӡоит», - иҳәеит Кәыџба.