Иара убас, Аҳәынҭқарра Ахада имҩаԥысыз аекономикатә форум аҳәаақәа ирҭагӡаны Аԥсны азинҷыдатә кредит апрограмма аҿиареи уи аҭареи рзы амҩатә хсаала азԥхьагәаҭан ҳәа инаҵшьны иазгәеиҭеит. Аҳәынҭқарра Ахада иажәақәа рыла, ари апрограмма аҳәаақәа ирҭагӡаны ахцәажәара зҭаху азҵаарақәа жәпакы ыҟоуп.
Атәыла ахада гәык-ԥсыкала иҭабуп ҳәа иеиҳәеит Урыстәыла Ахада Владимир Путин. Бадра Гәынба иазгәеиҭеит ҩ-ганктәи аусеицура азҵаарақәа жәпакы ишрылацәажәаз лаҵарамза 9 рзы имҩаԥысыз аиԥылараҿы, уи аихшьаалақәа рыла иалкаау анапынҵақәеи аӡбамҭақәеи жәпакы рыдыркылахьеит. Уажәы урҭ активла аус рыдырулоит.
Сергеи Назаров иазгәеиҭеит ҩ-ганктәи аинырра аҿиара ишаҿу. Иара иажәақәа рыла, ауадаҩрақәа шыҟоугьы, аусеицура иабзоураны ареспублика аизырҳара амҩа иануп. Иара убасгьы инаҵшьны иазгәеиҭеит аекономикатә динамика бзиа, арбага хадақәа, ахашәалақәеи азеиԥш аалыҵи уахь иналаҵаны аизҳара ишаҿу иҳәеит.
Хазы Сергеи Назаров дазааҭгылеит Урыстәыла Ахада аинвестициатә проектқәа рыдгылара ахәҭаҿы ииҭаз анапынҵақәа, иара убас уажәы зынагӡара иаҿу анапынҵақәа жәпакы. Сергеи Назаров инаҵшьны иазгәеиҭеит арҭ апроцессқәа иаарласны рдәықәҵара хықәкыс ишрымоу. Сергеи Назаров игәаанагарала, иарбоу апроектқәа рынагӡара Аԥсны ԥхьаҟатәи аҿиараҿы лагала дуны иҟалоит.
