Азыҳәақәа рыдкылара хыркәшахеит ԥхынгәымза алагамҭазы.

Аҳәынҭқарра Ахада иусԥҟала иаԥҵоу акомиссиа аҭыԥқәа гәарҭоит: адгьыл  аҭагылазаашьа зеиԥшроу инаркны аарыхратә мчхарақәа разыхиара аҟынӡа.

Гәдоуҭа араион анапхгара аҭааит Даур Мишьелиеи (Жәандәрыԥшь ақыҭа), Дырмит Ҳаразиеи (Џьырхәа ақыҭа), Анатоли Ҳагәышьи (Калдахәара ақыҭа) рынхамҩақәа. Урҭ ицәырыргаз апроектқәа аҳәынҭпрограмма алахәхара аҭахрақәа ирықәшәом.

Гагра араион аҿы азҿлымҳара рыҭан аус зуа анаплакқәа, Гьачрыԥшьи Цандрыԥшьи аҳаблақәа рҿы иҟоу акалмаҳааӡарҭатә нхамҩақәа «Абраскьыли» «Христофори», урҭ рнапхгаҩцәа абизнес арҭбаареи аизырҳареи рзы аҳәынҭқарратә субсидиақәа ирықәгәыӷуеит.

Агәаҭара алҵшәақәа рыла аихшьаалатә лкаақәа ҟарҵоит. Аԥаразоужьра зауа изы аҵыхәтәантәи аӡбамҭа аднакылоит аицлабратә комиссиа.