Барцыц иҳәеит Европатәи аидгыла иреиҳаӡоу ахаҭарнак Каи Каллас иҳәамҭақәа ООН Аԥҟаԥҵәаҿы иазгәаҭоу ажәларқәа рхатәҳәаақәҵаразы рзин ишаҿагыло. Иара игәалаиршәеит аԥсуа-адыга диаспора Шьамтәыла иааннакыло аҭыԥ ду атәы, иазгәеиҭеит аҳәынҭқаррабжьаратә еизыҟазаашьақәа аҿиара ишаҿу аекономикатә, ахәаахәҭратә, агуманитартә усхкқәа рҿы. Аизыҟазаашьақәа арҿиаратә ҟазшьа рымоуп, ахԥатәи аган иаҿагылаӡом, Аԥсны аделегациа акәзар Дамаскҟа ҩ-визитк мҩаԥыргахьеит, ахԥатәи рҽазыҟарҵоит.
«Сара Европатәи ачынуаа иргәаласыршәар сҭахуп жәларбжьаратәи азин аҿы аҳәынҭқарра аиԥымҟьара еиԥш иҟоу аилкаара шыҟоу. Аҳәынҭқарратә суверенитет акт азхаҵара, адипломатиатә еизыҟазаашьақәа рышьақәыргылара – ари аҳәынҭқарра иазинуп... Ҳусеицура хықәкыс иамоу аҿиара ауп», - ҳәа иажәа хиркәшеит аминистр.
