АЖӘАБЖЬҚӘА
сегодня 19:11
Башкортосҭан иусуратә визит аҳәаақәа ирҭагӡаны Аԥсны Ахада Бадра Гәынба аусутәи, аексперттәи, аҭҵаарадырратәи еилазаарақәа рхаҭарнакцәеи, иара убас астудентцәеи дырԥылеит
Аиԥылара мҩаԥысит Уфа иҟоу Евразиатәи аҭҵарадырратә центр Аҵараиурҭабжьаратә студенттә кампус аҿы.
Аиԥылара алагамҭазы Башкортосҭан Ареспублика аиҳабыра Аԥыза-министр Андреи Назаров иазгәеиҭеит Аԥсны аус ацура аҿиара аҵак ҷыда шарҭо. Иара иажәақәа рыла, Башкортосҭани Аԥсни реинырра аҭоурыхтә шьаҭа ҵаулақәа амоуп, иахьа иҿиоит ахырхарҭақәа жәпакы — агуманитартәи аҵаратәи еимадарақәа инадыркны атуризми, аекономикеи, ацифратә проектқәеи, егьырҭ аусхкқәеи рҟынӡа.
Аҳәынҭқарра Ахада Бадра Гәынба иазгәеиҭеит Аԥсни Башкортосҭани рыжәларқәа акыр шықәса инеиԥынкыланы ишеидгылоз, урҭ аизыҟазаашьақәа ишалдыршо иахьа ҩ-республикак реинырра арҭбаара.
Атәыла ахада Башкортосҭан анапхгара иҭабуп ҳәа реиҳәеит ишьақәдыргыло аизыҟазаашьақәа рдинамиказы. Аинырра цоит атуризми, аинфраструктуреи, атранспорти, аҿартә политикеи русхкқәа рҿы. Ареспубликақәа рыбжьара атауареикәыршара иацлеит, акрызҵазкуа шьаҿаны иҟалеит Аҟәеи Уфеи рыбжьара ишиашоу аҳаиреимадара аусура аларгара.
Хазы Бадра Гәынба иҭабуп ҳәа реиҳәеит Аҟәа аԥшаҳәеи уи иаԥну аҭыԥи реиҭашьақәыргылараҿы иҟарҵаз адгыларазы.
Бадра Гәынба иажәақәа рыла, Урыстәылатәи Афедерациеи Аԥсни иҷыдоу, аимадара бзиа рыбжьоуп. Атәыла ахада инаҵшьны иазгәеиҭеит Аԥсны арҭ аизыҟазаашьақәа рыхә шыршьо, ишдырӷәӷәо.
Аԥсны ахада иазгәеиҭеит изҭааз акампус лабҿаба ишаанарԥшуа арегион алшара ду, уи аусура алҵшәақәа хымԥада рхы унардыруеит.
Бадра Гәынба инаҵшьны иазгәеиҭеит Башкортосҭан аихьӡарақәа аԥсуа жәлар ацәанырра ҟәандақәа шрызцәырнаго.
Иара убас, аӡиас Белаиа ахықәан Аҟәатәи аԥшаҳәа аколоннада аҩыза ашьақәыргылара Аԥсни Башкортосҭани ԥхьаҟагьы иҿиало аиашьаратә еизыҟазаашьақәа рырӷәӷәара исимволны иҟалеит.
Аиԥылара алахәылацәа иддырбеит Аԥсны, уи аекономикатәи атуристтәи лшарақәа, аинвестициатә лшарақәа, еиуеиԥшым аусхкқәа рыҿиара ртәы зҳәо афильм.
Аԥсны аԥыза-министр ихаҭыԥуаҩ Џьансыхә Нанба ареспублика асоциал-економикатә ҿиара ахырхарҭа хадақәа, аусутә еимадарақәа рырҭбаареи еицырзеиԥшу апроектқәа рынагӡареи рзы алшарақәа дрылацәажәеит.
Аусеицура ԥхьаҟатәи аҿиара азҵаарақәа рзы ргәаанагарақәа еимырдеит.
