АЖӘАБЖЬҚӘА
вчера 23:23
Гәымсҭа аӡиас хыхьтәи ацҳа азааигәара Аԥсны Жәлар Рџьынџьтәылатә еибашьраҿы иҭахаз аибашьцәа ирызку еиҭашьақәыргылаз амемориал аартра мҩаԥысит
Аԥсны Аҳәынҭқарра Аиааиреи Ахьыԥшымреи рымш аламҭалазы Гәымсҭа аӡиас хыхьтәи ацҳа азааигәара 1992-1993 шықәсқәа рызтәи Аԥсны Жәлар Рџьынџьтәылатә еибашьраҿы иҭахаз аибашьцәа ирызку еиҭашьақәыргылаз амемориал аартра мҩаԥысит.
Аибашьра ашьҭахьтәи аамҭазы аҭыԥантәи ауааԥсыра рымчала иаԥырҵаз амемориал ирҿыцу, еиҿкаау, инагӡоу архитектуратә ԥшра аиуит.
Зымҽхак ҭбаау аиҭашьақәыргыларатә усурақәа мҩаԥгоуп аицлабра «Аԥсны арҿиаҩцәа» аҿы аҭыԥантәи ауааԥсыра раԥшьгаратә гәыԥ аиааира ахьагаз иабзоураны.
Апроект асоциалтә технологиақәа рцентр «Гарант» инанагӡеит Урыстәылатәи ахада игрантқәа Рфонд афинанстә цхыраарала.
Ацеремониа рхы аладырхәит Аҟәа араион анапхгара ахаҭарнакцәа, ауаажәларра, аибашьра аветеранцәа, иара убас аицлабратә программа аиҿкааҩцәа.
