Аҟәа. Мшаԥымза 25, 2023 шықәса. Аԥсныпресс. Ихьыԥшым Аҳәынҭқаррақәа Реиҩызара атәылақәа Ринститути Иран адәныҟатәи аусқәа Рминистрра аҟны иҟоу аполитикатәии жәларбжьаратәии аҭҵаарақәа Ринститути Аҳәынҭқарратә Еилазаара «Росатомоми» жәларбжьаратәи аконференциа «Зҽеиҭазкуа адунеи аҿы урыстәыла-ирантәи аусеицура» мҩаԥыргоит. Уи рхы аладырхәуеит урыстәылатәии аҳәаанырцәтәии аекспертцәа.
Алагалажәа ҟаҵо евразиатә интеграциеи аџьынџьуаа рымадареи, Ихьыԥшым Аҳәынҭқаррақәа Реиҩызара аусқәа рзы Аҳәынҭқарратә Дума акомитет ахантәаҩы актәи ихаҭыԥуаҩ, Ихьыԥшым Аҳәынҭқаррақәа Реиҩызара иалоу атәылақәа Ринститут анапхгаҩы Константин Затулин иазгәеиҭеит:
«Хаҭала сара иҟоу аҭагылазаашьа абас ала еилыскаауеит. Мраҭашәара ус иҳабжьнагоит: «Шәҳацыз, иаҳҳәо шәацныҟәа, усҟан ҳара ҳаиԥш-зеиԥшу ҳәынҭқарраны шәҟаҳҵоит». Урыстәылеи Ирани даҽа принципк иадгылоит: «Ҳара шәҳадгыл, усҟан шәхаҭара шыҟоу иааншәыжь».
Аконференциа рхы аладырхәуеит Урыстәылатәи Афедерациа иҟоу Иран ацҳаражәҳәаҩ Џьалали Казем, Аҳәынҭқарратә Еилазаара «Росатом» жәларбжьаратәи аусеицура адепартамент адиректор Андреи Белиаков, Иран адәныҟатәи аусқәа Рминистрра аполитикатәии жәларбжьаратәии аҭҵаарақәа Ринститут адиректор Мохаммад Шеихолиеслами, Урыстәыла анаукақәа Ракадемиа мрагылараҭҵаара Аинститут анаукатә напхгаҩы, Урыстәыла анаукақәа Ракадемиа академик Витали Наумкин, уҳәа убас егьырҭгьы.
Константин Затулин Урыстәылатәи Афедерациа Аҳәынҭқарратә Дума ахантәаҩы Виачеслав Володин иҟынтәи аконференциа иалахәуз рахь адныҳәаларатә ҳәамҭа даԥхьеит:
«Еицынагӡахо апроектқәа реффективра ашьҭыхра азы аконструктивтә ҟазшьа змоу ажәалагалақәа ҳтәылауаа ринтересс иақәшәо аҟаҵара акырӡа аҵанакуеит. Алҵшәа бзиақәа змоу аусуреи ақәҿиара дуқәеи шәзеиӷьасшьоит», -ҳәа иазгәаҭоуп аҳәамҭаҿы.
Аконференциа рхы аладырхәит Урыстәыла иҟоу Аԥсны Ацҳаражәҳәарҭа атташе Станислав Қаџьаиа, ҳәа Аԥсныпресс ахь адырра ҟанаҵеит Аԥсны адипломатиатә хаҭарнакра апресс-маҵзура. сообщили Апсныпресс в диппредставительстве РА.
