Аҟәа. Мшаԥымза 27, 2023 шықәса. Аԥсныпресс. Аԥсны Жәлар Реизара – Апарламент Аиҳабы Лаша Ашәба Анас Кьышьмариа Ауаҩы изинқәа рзы азинмчы змоу Аппарат дыдирдырит.
Лаша Ашәба ԥасатәи Аппарат анапхгаҩы Шьаҟрыл Асидеи аколлективи иҭабуп ҳәа реиҳәеит хәышықәса рыҩныҵҟала имҩаԥгоу аусуразы: «Иҟаҵаз рацәоуп ари аинститут аҿиаразы. Ишьақәыргылоуп зусура профессионалла иназыгӡо аҿарацәа ргәыԥ. Иҭабуп ҳәа шәаҳҳәоит Аԥсназы аҵак ду змоу ари аусбарҭа ашьақәгылараҟны шәлагаламҭазы, ҳтәылауаа рзинқәа рыхьчараҟны ирышәҭо ацхырааразы».
Асида Шьаҟрыл лганахьала, иара убас напхгара зылҭоз аколлектив иҭабуп ҳәа ралҳәеит, Ауаҩы изинқәа рзы азинмчы змоу Кьышьмариа Анас ақәҿиарақәа лзеиӷьалшьеит.
«Сгәы иаанагоит Ауаҩы изинқәа рзы азинмчы змоу лофис аҿиара иацнаҵоит ҳәа. Ақәҿиарақәа шәзеиӷьасшьоит. Ҳара, азинхьчаратә уаажәларроуп, есқьынгьы ҳшәыдгылоуп, ҳшәыцхраалоит», - ҳәа илҳәеит лара.
Апарламент Аиҳабы Лаша Ашәба Асида Шьакрыл Аԥсны Аҳәынҭқарра атәылауаа рзинқәеи рхақәиҭрақәеи, закәанла ирымоу ринтересқәеи рыхьчараҟны ллагаламҭазы Аԥсны Жәлар Реизара – Апарламент Аҳаҭыртә шәҟәы ланеишьеит.
Ауаҩы изинқәа рзы азинмчы змоу Кьышьмариа Анас аколлектив ддырдыруа, Апарламент Аиҳабы иҳәеит: «Анас Руслан-иԥҳа, ишәыдаҳныҳәалоит ари амаҵзура ҳаракы ахь шәалхра. Шәара ижәдыруеит ари аусура зызку. Ҳәарада, ауаҩы изинқәа рыхьчара Аԥсны мацара акәӡам, адунеи зегьы иуадаҩны иҟоуп. Ари аусура аҳәынҭқарразы аҵак ду амоуп. Сара агәра згоит, Шәара аҭакԥхықәра ныҟәызго, агәаӷь змоу ауаҩ иаҳасабала, ара аусура шшәылшо. Сгәы иаанагоит ,ари аиҿкаара шьаҭазыркыз иаԥырҵаз атрадициа бзиақәа рынагӡара, реихаҳара шәылшоит ҳәа».
Кишьмариа Анас Апарламент Аиҳаби адепутатцәеи иҭабуп ҳәа ралҳәеит илырҭаз агәрагаразы. «Ари, хымԥада, аҭакзыԥхықәу маҵзуроуп. Сгәы иаанагоит Шәаргьы шәколлегацәагьы ҳабжьара аилибакаара ҟалап ҳәа. Ҳаԥхьаҟа аус дуқәа шьҭоуп. Ареспубликаҟны ауаҩы изинқәа ҳаҭыр рықәырҵоит, сгәыӷуеит ари аинститут аԥхьаҟагьы арҿиара ҳалшап ҳәа», - лҳәеит лара.
