Аҟәа. Лаҵарамза 18, 2023 шықәса. Аԥсныпресс. Атәыла аԥыза-министр Алеқсандр Анқәаби Урыстәыла Приволжтәи афедералтә округ ҳаҭыр зқәу аконсул Владимир Литвинчуки Аԥсни Нижегородтәи аобласти рыбжьара еиуеиԥшым аусхкқәа рҿы аусеицура азҵаарақәа ирылацәажәеит, ҳәа адырра ҟанаҵоит аминистрцәа Реилазаара апресс-маҵзура.
Ҳаҭыр зқәу аконсул ишазгәеиҭаз ала, аганқәа аҵарадырратә усхкы аҿы русеицура қәҿиара аҿиара мҩаԥысуеит: иахьа Нижегородтәи аҳәынҭқарратә анџьныр-економикатә Университет аҿы аҵара рҵоит Аԥснынтәи 20-ҩык астудентцәа – апрограммаҟаҵара, афатәтә ааглыхра атехнологиақәа, афымца-нџьныр, анџьныр-механикцәа, амаҭәа адизаинерцәа, уҳәа. 17-ҩык ареспублика атәылауаа Нижни Новгород ақалақь аҿы Урыстәыла аҩныҵҟатәи аусқәа Рминистрра Академиа аҿы иҷыдоу иреиҳаӡоу аҵарадырра роуеит, абжьаратәи ашколқәа рҵаҩцәа реиҭныԥсахлара апрограмма ашьақәгылара иаҿуп.
Владимир Литвинчук Ԥсҳәы ақыҭан ҳазҭоу ашықәсан ихыркәшахараны иҟоу, Кавказ анемец-фашистцәа рҟынтәи ахы иақәиҭызтәыз аибашьцәа рбаҟа аиҭашьақәыргыларазы апроект анагӡара шымҩаԥысуа еиҭеиҳәеит.
Алеқсандр Анқәаб Владимир Литвинчук аҩганктәи аизыҟазаашьақәа рыҿиара аҿы активла алахәхара азы иҭабуп ҳәа еиҳәеит, убри аан уи Аԥсны Анапхгара аҟынтәи адгылара шыҟало инаҵшьны иазгәеиҭеит. Прочитано 37 раз. Последнее изменение 18.05.2023.
