Аҟәа. Рашәарамза 7, 2023 шықәса. Аԥсныпресс. «Москва Аҩны» Аҟәа ақалақь аҿы аурыс поет дуӡӡа Алеқсандр Сергеи-иԥа Пушкин иира Амш азгәаҭара мҩаԥнагеит, ҳәа адырра ҟанаҵеит «Москва Аҩны» апресс-маҵзура.
Аусмҩаԥгатә мҩаԥысит аихамҩатә станциа «Гума» аҿы.
Ахәылԥаз асасцәа рзы иалагалан адресс-код: аҳәса рзы ацәацәҩыча ҵкқәа, аԥшандагақәа, анапхазқәа, ашьаҵатәы ҷыда, ахацәа рзы – аклассикатә костиумқәа, афракқәа, акомзолқа.
«Москва ақалақь Анапхгареи хаҭала сара сыхьӡалеи, аурыс поет дуӡӡа Алеқсандр Сергеи-иԥа Пушкин диижьҭеи 224- шықәса аҵра иазку ари ахәылԥаз аҿы бзиала шәаабеит ҳәа шәасҳәоит. Ари аусмҩаԥгатә аурыс бызшәа Амш азгәаҭара аҳәаақәа ирҭагӡаны имҩаԥысуеит.
Алеқсандр Пушкин аурыс литература ашьақәгылара аҿы идуӡӡоу илагала ахә ашьара уадаҩуп, уи жәаҳәарада аурыс литературатә бызшәа ашьаҭаркҩыс дыԥхьаӡазар ҟалоит», – ҳәа асасцәа рахь ихы рханы иҳәеит «Москва Аҩны» адиректор Алеқсандр Бигәаа.
Аныҳәатә хәылԥазы атема «А.С.Пушкин илакәқәа рдунеи» ала ахәыҷқәа рзы асахьаҭыхратә мастер-класс амҩаԥгарала иаатит. Анаҩс, аквартет «Каприччиои» Аҟәатәи акультура аҵараиурҭа акәашаратә коллективи рықәгылара мҩаԥысит. Уи ашьҭахь пушкинтәи аепоха иаҵанакуа илыԥшааху аетикет азы алекциеи аусмҩаԥгатә асасцәа рзы аклассикатә кәашаразы амастер-класси мҩаԥысит.
Рашәарамза 7 рзы Аҟәа ақалақь, «Москва Аҩны» аҿы имҩаԥысуеит Алеқсандр Пушкин иҩымҭақәа рыла иреиӷьу арҿиаратә усумҭа азы аконкурс «Души прекрасные порывы» афинал.
Аусмҩаԥгатәқәа еиҿкаауп Москва ақалақь Анапхгара, Москва ақалақь адәныҟаекономикатәии жәларбжьаратәии аимадарақәа рзы Адепартамент, Москва ақалақь Аҳәынҭқарратә Автономтә Усбарҭа «Аҳәаанырцә иҟоу аидгьылуаа агуманитартә усеицуреи аусуратә еизыҟазаашьақәеи рыбжьаҵара азы Ацентр – Москватәи аидгьылҩы Иҩны, иара убас Аҟәа иҟоу уи аҿга- «Аҟәа иҟоу Москва Аҩны».
