Аҟәа. Ажьырныҳәамза 18, 2024 шықәса. Аԥсныпресс. Абылтәы аџьармыкьа аҿы ишьақәгылаз аҭагылазаашьеи анефҭаалыҵқәа Аԥсныҟа раагара аиҿкаареи ирыдҳәалоу азҵаарақәа ирылацәажәеит ажьырныҳәамза 18 рзы имҩаԥысыз аекономикатә политикеи ареформақәеи аинформациатә технологиақәеи рзы апарламенттә Еилакы инарҭбаау аилатәара аҿы.
Аилак ахантәаҩы ихаҭыԥуаҩ Бадрик Ԥлиа имҩаԥигоз аилатәара рхы аладырхәит Апарламент Аиҳабы Лаша Ашәба, адепутатцәа, аԥыза-министр актәи ихаҭыԥуаҩ, аенергетикеи атранспорти рминистр Џьансыхә Нанба, аекономика аминистр ихаҭыԥуаҩ Ҭеимураз Миквабиа, Аҳәынҭқарратә ҳазалхратә Еилакы ахантәаҩы актәи ихаҭыԥуаҩ Алиас Лабахәуа, абылтәытә еилазаарақәа рхаҭарнакцәа.
Апарламент аофициалтә саит аҿы иҟоу адыррақәа рыла, Анагӡаратә мчра ахаҭарнакцәа адепутатцәа аԥсны-урыстәылатәи аҳәынҭқарратә ҳәаа аҿы иҟоу аҭагылазаашьеи Урыстәылантәи Аԥсныҟа експорт ҳасабала абылтәи ахьшьтәи раагаразы урыстәылатәи аган аҿцәажәарақәа рымҩаԥысшьеи рзы адепутатцәа адырра рырҭеит.
Ишдыру еиԥш, ԥхынҷкәынза 16, 2023 шықәса рзы иҭыҵыз Урыстәыла аиҳабыра Ақәҵара №2180 инақәыршәаны, аилахәыра «Роснефть» фымз ирҭагӡаны Аԥсныҟа анефҭаалыҵқәа хазхаҭала рекспорт амҩаԥгаразы аҷыдалкаатә зин аҭоуп. Ақәҵара аилахәыра «Роснефти», уи иаҿыгоу анаплакқәеи рымацара Аԥсни Аахыҵ Уаԥстәылеи рахь абылтәы аагара азин шрымоу азгәанаҭоит. Убри инамаданы, Ҭеимураз Миквабиа иажәақәа рыла Аԥсны аекономика Аминистрра аҭагылазаашьа аҭышәынтәалара иазкны ауснагӡатәқәа мҩаԥнагоит.
Аилатәарахьы ааԥхьара зауз абылтәы џьармыкьа ахаҭарнакцәа дара рнаплакқәа иҭышәынтәаланы аусуразы алшара ахьрымам инамаданы агәҭынчымра аадырԥшит. Иазгәаҭан Ареспублика аҿы абылтәы аҭаҵәах ыҟазарц азы еиуеиԥшым аилазаарақәеи абылтәыла аиқәыршәаҩцәеи аилаӡарақәа шрыбжьарҵахьаз, урҭ инарықәыршәаны анефҭаалыҵ аиҳарак ахә заанаҵы ашәара шымҩаԥгаз, аха уи ԥхынҷкәынмза 21, 2023 шықәса раахыс аҳәааҿы, урыстәылатәи аганаҿы ишгылоу, Абылтәыҭаҭәарҭақәа аус шырымуа.
Апарламент адепутатцәа Аԥсны Анапхгареи урыстәылатәи рколлегацәеи иарбоу азҵаара аганахьала русуеицура активизациа шхымԥадатәиу азгәарҭеит.
Аилатәара иалахәыз альтернатива аҳасабала Аԥсныҟа абылтәы аагара азҵаара иалацәажәеит, убри аан дара амонополиа иаҿагыло азакәанԥҵара излауа ала ирласны адкылара шхымԥадатәиу азгәарҭеит.
Адепутатцәа аамҭа кьаҿ иалагӡаны аекономикатә политикеи ареформақәеи атехнологиақәеи рзы апарламенттә Еилакы аилатәара амҩаԥгареи атәыла Анапгара ишьақәгылаз иуадаҩу аҭагылазаашьа алҵра азы имҩаԥнаго аусура аихшьаалақәа рыҟаҵареи рзы аӡбамҭа рыдыркылеит.
