«Хәызмоу арҿиамҭақәа ишабалак аҳәаа рахыгара ҟалом. Сара 2015 шықәсазы Москва имҩаԥысуаз ацәыргақәҵахь усумҭақәак ииазгеит. Уи аганахь ала аԥышәа сымоуп. Аԥсни Урыстәылеи ркультуратә усҳәарҭақәа рыбжьара иахәҭаны иҟоу аиқәшаҳаҭра ҟалар, иалшоит аамҭа мгакәа урҭ Урыстәылаҟа рнагара. Аха иазгәасҭар сҭахуп, асахьақәа хымԥада иҷыдоу амашьынақәа рыла имҩаԥгатәуп, мап анакәха, асахьақәа зламҩанырго атранспорт аҿы иахәҭаны ишьоу аҭагылазаашьа аԥҵамхар, урҭ еиҳагьы иԥхасҭахар алшоит»,- ҳәа иҳәеит Амиаҭтә сахьатә галереиа адиректор.

«Амашьынаҿы иҷыдоу амикроклимат аԥҵамхар ашәыгатә ҿысҭақәа ԥхасҭахоит», - ҳәа инаҵшьны иазгәеиҭеит  Сурам Сақаниа.

Аԥсны аус зуаз ареставраторцәа ареспубликахь асахьақәа рҭагылазаашьа зныԥшуа аҳасабырбақәа аарышьҭроуп. Урҭ адокументқәа шьаҭас иҟаҵаны ԥхьаҟатәи аусура атәы ӡбахоит ҳәа инаҵшьны иҳәеит Амилаҭтә сахьатә галереиа адиректор.

«Иҟалоит аилаӡара ашьаҭала еиҭа иаауа ҟалар. Аха еиҭасҳәахуеит, аусураз аҭагылазаашьақәа аԥҵатәуп. Уи ауада ҭбаа, иҷыдоу арлашаратә системақәа уҳәа аҭахуп», - ҳәа иҳәеит Сурам Сақаниа.