Ишьақәгылаз амш ԥхаррақәа инарымаданы ашәҭтә сезон ҵыԥх еиԥш сынтәагьы заа иалагеит – жәабран раԥхьатәи амшқәа рзы. Уаанӡатәи ашықәсқәа рзы арҭ ашәҭқәа аиагара иалагон амыз аҩшамҭазы.
Амимоза аиҳарак аигара азԥхьагәаҭоуп жәабранмза анҵәамҭа инаркны хәажәкырамза раԥхьатәи амшқәа рҟынӡа. Амимоза Урыстәылаҟа акоммерциатә партиақәа рыла еиԥш, идуум ашәҭшьыҵәрақәа рыла рхатәы ҭаххрақәа рзы иргоит. Атауартә ԥшра аиқәырхаразы арҭ акыр иҟәымшәышәу, иуашәшәыроу ашәҭқәа транспортла рыиагараан иҷыдоу аҭагылазаашьақәа рзаԥҵазароуп. Амимоза аҳауа зҭамло еилаҳәаны акаробкақәа ирҭарҵоит, анаҩс илаҟу атемпературатә режим ала ииаргоит. Ашәҭтә еидара аамҭа кьаҿ иалагӡаны егьырҭ аидарақәа раԥхьа аҳазалхратә гәаҭара иахысуеит.
