Аҟәа. Ԥхынҷкәынмза 21, 2023 шықәса. Аԥсныпресс. Ԥхынҷкәынмза 20 азы Аҳазаләратә ҭыԥ «Ԥсоу» аҿы иаанкыланы игәаҭан автомашьына «Nissan Terrano». Уи аԥсҟы икын Аԥсны атәылауаҩ.  Автомашьына аҩныҵҟа ирбеит 4 цырак акриптовалиута арҳара иазку аппаратқәа. 

Аԥсны Аҳәынҭқарра аҳазалхратә ҵакыра ашҟа заагара азы аԥкрақәа алагалоу, акриптовалиута арҳара иазку амаругақәа рымырхит.

Аԥсны аҳәынҭқарратә ҳазалхратә Еилакы аоперативтә ҟәшеиҵақәа аиқәыршәагақәа изакәанымкәа атәыла алагалара иадҳәалоу аҭагылазаашьа аилкааразы иацҵаны аусмҩаԥгатәқәа мҩаԥыргоит.    

Административтә зинеилагара азы аусеилыргара хацыркуп. 

Аҟәа. Ԥхынҷкәынмза 21, 2023 шықәса. Аԥсныпресс. 1992-1993 шш. Аԥсны жәлар Рџьынџьтәылатәи еибашьра хатәгәаԥхарала иалахәыз аибашьцәа Маиҟәаԥ ақалақь аҿы Аԥсны аҳәынҭқарратә ҳамҭақәа ранаршьеит, ҳәа адырра ҟанаҵоит «Советская Адыгея».

Аҳәынҭқарратә ҳамҭақәа ранашьара ацеремониа мҩаԥысуан агуманитартә ҭҵаарақәа рзы ареспубликатә Институт аҿы. Уи ихы алаирхәит амилаҭқәа русқәеи аидгьылуааи амассатә информациа ахархәагақәеи рымадареи рзы Адыгеиа Акомитет ахантәаҩы Аскер Шхалахов.

Аҳамҭақәа ранашьара мҩаԥигеит Аҟәа ақалақь ахада ихаҭыԥуаҩ Авҭандил Сурманиӡе.

Аҟәа. Ԥхынҷкәынмза 21, 2023 шықәса. Аԥсныпресс.  Апрокуратура Хада азакәанԥҵара ақәныҟәара ахылаԥшра Аусбарҭа 2022 шықәса инаркны 2023 шықәса актәи азыбжа аҟынӡа азинмчы змоу аусбарҭақәа рыла «Административтә зинеилагарақәа рзы аӡбараеиҿкаара азы» Ареспублика Аԥсны Азакәанеидкыла ақәныҟәара ахьынӡаларшаз азы апланла иазԥхьагәаҭаз агәаҭара мҩаԥнагеит.  

Аҩныҵҟатәи аусқәа Рминистрра Аҳәынҭинспекциа аусбарҭа агәаҭараан Аинспекциа амаҵурауаа русура аҿы аилагарақәа аадырԥшит, инҭкааны иуҳәозар, Автоинспекциа аусзуҩцәа, «Административтә зинеилагарақәа рзы аӡбараеиҿкаара азы» Ареспублика Аԥсны Азакәанеидкыла ахәҭаҷ  119, ахәҭа  1 инақәыршәаны, даҽакала иуҳәозар, ижәны, мамзаргьы арҩышьыгатә маҭәашьар рыдкыланы амашьына аԥсҟы акра азы ауааԥсыра административтә ҭакԥхықәа рақәыршәараан аилагарақәа ҟарҵон.   

Иарбоу азинеилагара азы административтә ҭакԥхықәра адҵара азы шьаҭас иҟоуп алкотестер ахархәарала, мамзаргьы амедицинатә  гәаҭарала амашьынарныҟәцаҩ ижәны дыҟоу дыҟаму, мамзаргьы арҩышьыгатә маҭәашьар идкыланы дыҟоу-дыҟаму аилкаара.  Аилагарақәа абарҭ афактқәа рыла иалкаахеит: амедицинатә гәаҭара алҵшәақәа  зныз адырранҵақәа, мамзаргьы аметрологиатә гәаҭара иахысыз алкатестерқәа  ыҟаӡамызт. 

Аҟәа. Ԥхынҷкәынмза 21, 2023 шықәса. Аԥсныпресс.  Ԥхынҷкәынмза 21 рзы Апарламент аҿы имҩаԥысит  жәларбжьаратәи, апарламентбжьаратәи аимадарақәеи аидгьылуаа рымадареи рзы Аилак аилатәара мҩаԥысит, ҳәа адырра ҟанаҵоит Жәлар Реизара-Апарламент апресс-маҵзура.

Аилак алахәылацәа «Аекономикатә усқәа рзы аӡбаратәи арбитражтәи аӡбарақәа рынагӡареи разхаҵареи рзы Ареспублика Аԥсни Урыстәылатәи Афедерациеи рыбжьара Аиқәшаҳаҭра аратификациа азы» азакәан апроект иахәаԥшит.

Аҟәа. Ԥхынҷкәынмза 21, 2023 шықәса. Аԥсныпресс. 85-шықәса зхыҵуаз ахаҵа дҭахеит Аҟәа араион Ешыра ақыҭан иҟалаз абылра аҿы, ҳәа адырра ҟарҵоит  Иҷыдоу аҭагылазаашьақәа рзы Аминистрра аҿы.  

«Абылра шыҟалаз азы адырра ҟалеит асааҭ 03:49 рзы. Аҟәа ақалақьи Аҟәа араиони рыхьчара азы Аԥшаара-еиқәырхаратә Отриад абылрацәыхьчаратә отриад аҭыԥаҿы ианнеи аамҭазы аамҭа аргылара зегьы амҽханакхьан», - ҳәа адырра ҟанаҵоит Ахылаԥшырҭа апресс-маҵзура.

Иҟалаз абылра иахҟьаны аҩны шьаҭанкыла иблит. Амашәыр зыхҟьаз аилкааразы ауснагӡатәқәа мҩаԥысуеит.

Аҟәа. Ԥхынҷкәынмза 21, 2023 шықәса. Аԥсныпресс. Ԥхынҷкәынмза 21 азы Ареспубликатә ахәыҷтәы-қәыԥштә спорттә хәмаррақәа рышкол ашкол аҿы иалагеит аҳәса ркомандақәа рыбжьара анапылампыл азы ачемпионат, ҳәа адырра ҟанаҵоит аҿари аспорти русқәа рзы аҳәынҭқарратә Еилакы.  

Атурнир рхы аладырхәуеит  аа-командак: «Аҟәа-1», «Аҟәа-2», «Гагра», «Пицунда», «Гәдоуҭа», «Гәдоуҭа- 1», «Агәыӡера», «Ҭҟәарчал».

Атурнир аартра ацеремониа асасцәеи алахәылацәеи бзиала шәаабеит ҳәа рарҳәеит аҿари аспорти русқәа рзы аҳәынҭқарратә Еилакы ахантәаҩы Ҭарашь Ҳагба, Аԥсны Аҳәынҭқарра Амилаҭтә олимпиатә комитет апрезидент   Валери Аршба, Аҟәа ақалақь Ахадара аҿари аспорти русқәа Русбарҭа адиректор Ельза Ҳагба, ачемпионат аӡбаҩ хада, ареспубликатә категориа змоу аӡбаҩ Руслан Царгәыш.

Аҟәа. Ԥхынҷкәынмза 20, 2023 шықәса. Аԥсныпресс. Адлер иҟоу Краснодартәи аҳазалхра иатәу Ганрацәалатәи Автомашьынатә Аушьҭра-гәаҭаратә Пункт аусзуҩцәа изакәанымкәа аҭаҭын аалыҵқәа, автотранспортқәа ҩба иҭаҵәахны рыиагара иадҳәалоу афакт аадырԥшит. Абри азы адырра ҟанаҵоит Аладатәи аҳазалхратә Усбарҭа апресс-маҵзура.

Убас, автомашьына CHEVROLET LANOS агәаҭараан, ҷыдала еиқәыршәаз априбортә панель аҵаҟа ирыԥшааит аҭаҭын аалыҵқәа. Ари имаӡоу аҭыԥ аҿы «BUSINESS ROYALS» ҳәа ахьӡ змоу 120 блок (1200 пачка) асигареҭ аиагара рҽазыршәон. Иарбоу аҭаҭын аалыҵ зегьы урыстәылатәи акцизтә маркақәеи иҷыдоу адыргақәеи рықәыргыламкәа ииаргон.  Аҭаҭын аалыҵ зегьы уи зҭаз амашьынеи рымхра мҩаԥгоуп.

Аҟәа. Ԥхынҷкәынмза 20, 2023 шықәса. Аԥсныпресс. Аҩбатәи ахыркәшаратә аԥхьараҿы ирыдыркылеит иааиуа ашықәс азы Аҟәа ақалақь абиуџьет.

2024-тәи ашықәс азы абиуџьет апараметр хадақәа:

- ахашәалахәқәа рыла – 1 740 801.8 нызықь мааҭ;

- аныхтәқәа рыла – 1 821 801.8 нызықь мааҭ;

Ареспубликатә биуџьет аҟынтәи абиуџьетбжьаратәи атрансферқәа рзеиԥш еицҵалыҵ 81 млн. мааҭ рҟынӡа инаӡоит.  

Аизара аилатәара рхы аладырхәит аҳҭнықалақь ахада Беслан Ешбеи Ахадара афинансқәа Русбарҭа анапхгаҩы Алхас Лагәлааи.

Аҟәа ақалақьтә Еизара ахантәаҩы Дмитри Осиа, аилатәара аартуа, абиуџьет адкылара иаԥхьанеиуан мҽхакы ҭбаала аусура,   аҳҭнықалақь Ахадара аусзуҩцәа алархәны абиуџьет апроект есымша аус зуа адепутаттә комиссиақәа, ахәҭакахьала, абиуџьети ашәахтәқәеи афинансқәеи аекономикеи азԥхьагәаҭареи рзы акомиссиа аҿы иахәаԥшит, иалацәажәеит ҳәа иҳәеит.

Аҟәа. Ԥхынҷкәынмза 20, 2023 шықәса. Аԥсныпресс.  Аҳәынҭқарра Ахада Аслан Бжьаниа Аԥсны аҳәынҭқарратә шәарҭадара Амаҵзура аусзуҩцәеи аветеранцәеи рзанааҭтә ныҳәа рыдиныҳәалеит, ҳәа адырра ҟанаҵоит Аҳәынҭқарра Ахада ипресс-маҵзура.

Аҳәынҭқарра Ахада  аҳәынҭқарратә шәарҭадара аусбарҭақәа Рмаҵзура аусзуҩ иусура ҳаҭыр амоуп, аха убри аан еснагьгьы ашәарҭара ацуп, ари иуадаҩу азанааҭ ҷыдала азыҟаҵара, ахамеигӡара, агәымшәара аҭахуп ҳәа  инаҵшьны иҳәеит.  «Аԥсны Аҳәынҭқарра аҳәынҭқарратә шәарҭадара аусбарҭақәа русзуҩцәа ахаангьы иҳараку рыпрофессионализм аадырԥшуан ҳтәыла амилаҭтә шәарҭадара, асуверенитет ахьчара иадҳәаланы хьӡи-ԥшеи рыла инарыгӡоз руснагӡатәқәа рыҟны. Шәара шәусура улаԥш иҵашәо иҟаӡам. Аха есҽнытәи шәусура ҳҳәынҭқарра ашәарҭадара аиқәырхара иазкуп»,- ҳәа иаҳәоит адныҳәалараҿы.

Иахьа аҩныҵҟатәи еиԥш адәныҟатәи ашәарҭарақәа ирҿагылоуп. Убри инамаданы иҷыдоу амаҵзура аусбарҭақәа рхыдҵақәа рынагӡараан аоперативла урҭ аҭак аҟаҵара рыхәҭоуп. Аҳәынҭқарра Ахада  ихьыԥшым аԥсуа ҳәынҭқарра ақәгара иашьҭоу амчқәа шыҟоу иҳәеит. «Ҳҳәынҭқарреи ҳетноси реиқәырхара азы шәара иҟоу аметодқәа зегьы рыла иҟоу ашәарҭарақәа рҿагылара шәылшәыршароуп. Ҳҳәынҭқарра ҳзеиқәҳмырхар – ҳетногьы ҟалаӡом», - ҳәа аҳәынҭқарра аҿы имҩаԥысуа апроцеқәа рзы  ауаажәларра аинформациа рыҭара иаҵоу аҵакы ахадара азгәаҭо иҳәеит Аҳәынҭқарра Ахада.

Аҟәа. Ԥхынҷкәынмза 20, 2023 шықәса. Аԥсныпресс. Аԥсны аҩныҵҟатәи аусқәа Рминистрра аԥышәатәи аметодикатәи ацхыраара аҭара хықәкыс иҟаҵаны Аԥсныҟа иааит Урыстәыла аҩныҵҟатәи аусқәа Рминистрра аделегациа. Аделегациа идикылеит Аԥсны аҩныҵҟатәи аусқәа рминистр, амилициа аинрал-маиор Роберт Киут, ҳәа адырра ҟанаҵоит ахылаԥшырҭа  апресс-маҵзура.

Аиԥылара иара убас ихы алаирхәит Аԥсны иҟоу Урыстәыла аҩныҵҟатәи аусқәа Рминистрра ахаҭарнак Сергеи Голенков.

Аҭаара аҳәаақәа ирҭагӡаны иазԥхьагәаҭоуп аҩныҵҟатәи аусқәа русбарҭақәа русеицура  азҵаарақәа рыла аусуреи 2020 шықәса, жьҭаарамза 23 рзы ирыдыркылаз «Ареспублика Аԥсны аҩныҵҟатәи аусқәа Рминистрра аусбарҭақәа русзуҩцәа рсоциалтә гарантиақәеи рџьаԥса ашьҭыхреи Ареспублика Аԥсны аҩныҵҟатәи аусқәа Рминстрра аусбарҭақәа рматериал-техникатә еиқәыршәареи  рзы ахарџьқәа аицыфинансыркра азы» Аиқәшаҳаҭра апунктқәа рынагӡара еиҿырԥшны агәаҭареи, иара убас Ареспублика Аԥсны аҩныҵҟатәи аусқәа Рминистрра аусзуҩцәа тәанчахәыла реиқәыршәара аганахьала иҟоу адыррақәа еиҿырԥшны ргәаҭареи азԥхьагәаҭоуп.