Аконституциатә ӡбарҭа Аппарат апресс-маҵзура аҿы, Аҳәынҭқарра Ахада Жәлар Реизара-Апарламент аҿы уаанӡа ирыдыркылаз   «Аԥсны аҵакыраҿы иҟоу Пицундатәи аҳәынҭдача амазаратә комплекс Урыстәыла аҭарази ахархәарази» Аԥсны Аҳәынҭқарра Анапхгареи Урыстәылатәи Афедерациа Анапхгареи ирыбжьарҵаз Аиқәшаҳаҭра анагӡара азы» Аконституциатә закәан аԥыхра азҵаарала ааԥхьара ҟаиҵеит ҳәа Telegram-канал RESPUBLICA/РЕСПУБЛИКА аҿы ицәырҵыз адырра мцыркуп. Ииашаӡам иара убас  Аконституциатә ӡбарҭа Ахантәаҩи аӡбаҭа аӡбаҩцәеи рыбжьыҭира мҩаԥысит ҳәа иҟоу адыррагьы. 

Ареспублика Аԥсны Аконституциатә ӡбарҭа атәылауаа рахь ас еиԥш имцырку адырраҭарақәа харымҵаларц азы  ааԥхьара ҟанаҵоит.

Аконституциатә ӡбарҭа ауаажәларратә мчра аусбарҭаны иҟоуп, уи аусура анагӡараан Ареспублика Аԥсны Аконституциа ахәҭаҷ 72, Ареспублика Аԥсны азакәанқәеи ирықәныҟәоит. Аконституциатә Ӡбарҭа ахь Аҳәынҭқарра Ахада иҟынтәи аума, даҽа аҳәынҭқарратә мчра аусбарҭа аҟынтәи аума аҳәынҭқарратә дача «Пицунда» азы аконституциатә закәан аԥыхразы изеиԥшразаалак аҳәамҭақәа нашьҭӡамызт. 

Ахәҭакахьала, Аконституциатә ӡбарҭа абстрактә хәыцреи анормагәаҭарақәеи рзы азин шамам, ахатәы инициатива ала азҵаарақәа рыхәаԥшра, иара убас уи азы азыҳәамҭақәа ралагаларада азҵаарақәа рыхәаԥшреи рыӡбареи рзы азинмчы шамам азы адырра ҟанаҵоит.

Ареспублика Аԥсны Аконституциатә ӡбарҭа дарбанызаалак атәылауаҩ Аконституциатә ӡбарҭа дадҵаалар азы азин имоуп ҳәа инаҵшьны иазгәанаҭоит, насгьы Аконституциатә ӡбарҭа, ахәҭакахьала Аконституциатә ӡбарҭа апресс-маҵзура,  ауаажәларреи ажуналистцәеи ргәы иҵхо азҵаарақәа зегьы рҭак аҟаҵара есымша ишазхиоу азы аҳәамҭа ҟанаҵоит.