1994 шықәсазы Аԥснытәи аҳәынҭқарратә музеи Асахьатә галереиа Амилаҭтә сахьатә галереиа ҳәа ахьӡ ԥсахын, уинахыс иара хазхаҭалатәи аҳәынҭқарратә усбарҭаны иҟалеит.
1997 шықәсазы Аԥсны Актәи Ахада Владислав Григори-иԥа Арӡынба иӡбамҭа ала Амилаҭтә сахьатә галереиа Пушкин имҩала игылоу, ареволиуциа ҟалаанӡа аҳәса ргемназианы иҟаз ахыбра № 8 азоужьхеит. Хара имгакәа араҟа аиҭашьақәыргыларатә усурақәа хацыркын, аха ԥыҭрак ашьҭахь аԥаратә хархәагақәа разымхара инамаданы иаанкылан.
Агалереиа афонд аҟынтәи асахьақәа Лакоба имҩала иҟоу Аԥсны асахьаҭыхыҩцәа Реидгыла ахыбра аҩбатәи аихагыла аҿы ишьҭан.
Еиуеиԥшым ашықәсқәа рзы Асахьатә галереиа напхгара арҭон Алеқсеи Аргәын, Леонид Еныкь. 2001 шықәса раахыс Амилаҭтә сахьатә галереиа адиректорс дыҟоуп Сурам Сақаниа.
2024 шықәса, ажьырныҳәамза 21 ашьыжь шаанӡа, асааҭ ԥшьба инарзынаԥшуа, Аҟәа ақалақь, Лакоба имҩала игылоу Аԥсны асахьаҭыхыҩцәа Реидгыла иатәу Ацәыргақәҵатә зал Хада ахыбра амца акит. Иҟалаз абылра иахҟьаны, Аԥсны Амилаҭтә сахьатә галереиа афондқәа ацәыӡит. Аԥснытәи асахьаҭыхыҩцәа Реидгыла Ацәыргақәҵатә зал Хада аҿы иҟалаз абылра аҿы 150 рҟынӡа асахьақәа мацара еиқәхеит. Еиқәырхаз аусумҭақәа раԥхьа Аԥсуа театр ареквизиттә зал аҿы ишьҭаҵан. Анаҩс урт И.Папасқьыр ихьӡ зху Амилаҭтә библиотека ауадақәа руак ахь ииаргеит.
Ажьырныҳәамза 25 рзы аԥснытәи рколлегацәа ирыцхраарц азы Аԥсныҟа иааит Урыстәылатәи Афедерациа акультура Аминистрра адәныҟатәи аимадарақәеи амузеиқәеи Рдепартамент адиректор ихаҭыԥуаҩ Наталиа Чечель зхадараҿы дыҟаз урыстәылатәи ареставраторцәа ргәыԥ. Аԥсныҟа иааз аделегациа аилазаараҿы иҟан И.Е. Грабарь ихьӡ зху Урыстәылазегьтәи асахьаҭыхра ҭҵаарадырра-реставрациатә Центр аспециалистцәа, Аҳәынҭқарратә ҭҵаарадырра-реставрациатә Институт, Третиаков ихьӡ зху агалереиа, Аурыс музеи рхаҭарнакцәа.
Аспециалистцәа абылра иацәынхаз асахьақәа ирыхәаԥшит, иҭырҵааит, рфотосахьақәа ҭырхит, анаҩс иалыркааит араҟа, аҭыԥаҿы зеиҭашьақәыгылара ауаз, иара убас аиҭашьақәыргыларазы Урыстәылаҟа ииагатәхо асахьақәа.
Сынтәа Пушкин имҩала игылоу ахыбра аҩбатәи аихагыла аҿы, анаҩс араҟа еиқәхаз асахьақәа рыхәҭаки Амилаҭтә сахьатә галереиа аусзуҩцәа рыҩнаҵареи рзы уадақәак реиҭашьақәыргылара азԥхьагәаҭоуп.
