«Ҳара аринахысгьы активла ҳтәыла жәларбжьаратәи арена аҿы апозициақәа рӡыргара мҩаԥаагалоит, Аԥсны, евразиатә ҵакыра иузаҟәымҭхо ахәҭак аҳасабала хра злоу аимиџь ашьақәыргылара ҳҽазаҳшәалоит. Урыстәылатәи ҳҩызцәеи ҳпартниорцәеи рыцхыраарала ҳара Белорустәи Ареспубликеи Аԥсни ирыбжьоу аекономикатәи акультуратәи аимадарақәа еиҳа арҿиара азы аусура мҩаԥаагоит. Уи ҳусура ахырхарҭа хадақәа иреиуоуп», - ҳәа аҳәаҭа ҟаиҵеит Олег Барцыц.
Олег Барцыц иара убас Жәлар Рынхамҩа Аихьӡарақәа Рцәыргақәҵа аҿы ацәыргақәаҵа «Россия» даҭааит, иблала ибеит аекспозициа «Регионы России».
Урыстәыла иҟоу Аԥсны ахәаахәҭратә хаҭарнак Аԥсны Аҳәынҭқарра Москватәи Акультура Усуратә Центр Атехникатә маҵзура анапхгаҩы Сергеи Баженов дицны Жәлар Рынхамҩа Аихьӡарақәа Рцәыргақәҵа (ВДНХ) аҿы иҟоу Ареспублика Аԥсны амилаҭтә павилион аҭагылазаашьа гәеиҭеит. Араҟа имҩаԥысуа ареставрациа-ргыларатә усурақәа маҷк ада ахыркәшарахь инеихьеит.
