«Егрытәи аӡфымцатә Станциа аӡымҩахгагатә (адеривациатә) тоннель 8-тәи акилометр аҿы иҟалаз авариа иахҟьаны аҭӡы ахәҭак бгеит, убри аҟнытә абетонтә ԥҽыхақәа рыхәҭак атурбинатә ҩкаа иҭаҳаит. Астанциа аусура аамҭала аанкылара азы аӡбамҭа рыдыркылеит. Уи иахҟьаны Аԥсны аенергосистема аҿы афымцамч азымхара цәырҵит», - ҳәа уаанӡа адырра ҟанаҵон АУН «Амшынеиқәафымцамч».
Иҟалаз авариа инамаданы, насгьы Аԥсны аҭагылазаашьа аҭышәынтәалара азы афымцамч ала аиқәыршәара иазкны иҟоу аамҭеихша ахь иназыцҵоу аԥкрақәа ралагаларазы аӡбамҭа рыдыркылар акәхеит. Арҭ амшқәа рзы уахыки-ҽнаки рзы афымцамч аҿыхра 6 сааҭк рҟынӡа инаӡоит.
