«Аҳаирплан ТУ-І54 аҳаирбаӷәаза атәарҭатә плошьадка ашьшьыҳәа иаадгылеит. Зегьы Венгертәи Жәлартә Республика аҿы имҩаԥысыз Жәларбжьаатәи афольклортә коллективқәа рконкус аҿы аиааира згаз – Зҽаԥсазтәыз ашәаҳәареи акәашареи рансамбль «Нарҭаа» аҟынтәи абыргцәа атрап аҿы рцәырҵра ргәы хыҭхыҭуа иазыԥшын. Абар урҭ, агәырӷьареи агәадуреи рныԥшуаз, аԥсуа маҭәа рышәҵаны, рыжәҩахырқәа ауапақәа ықәыршәны иаацәырҵит аԥсуа быргцәа: Маадан Сақаниа, Џьгәаҭ Герзмаа, Куча Тәанба, Ҟастеи Ҭаниа, Давид Аиба, Ҭемыр Ванача, Ҭарашь Аџьапуа, Тандел Аџьапуа, Таркәыкә Лашәриа, Михаил Аргәын, Максуҭ Амҷба, Ҷыҷыкәа Ҵәыџьба. 102-шықәса зхыҵуа Ҭемыр Ванача дазгәдуны инапаҿы икуп – Венгриатәи ателехәаԥшра ала иаԥҵаз аҳамҭа «Ахьтәы ԥсаркәты». Зегьы гәыдибакылоит, еибагәӡуеит, еидныҳәалоит. Нас аҳаирбаӷәаза ахыбрахь еихоит, уаҟа урҭ ирыдныҳәаларц ирзыԥшуп Аҳәынҭқарратә хортә капелла. Уи аиааирагаҩцәа раҳаҭыр азы аныҳәа-фырхаҵаратә ашәа нанагӡоит», - ҳәа ишәҟәы аҿы агазеҭ аҟынтәи ацитата ааигоит Алеқсеи Аргун.
2023 шықәсазы ансамбль «Нарҭаа» ҩаԥхьа аиҭарҿиара рыӡбеит. Уи асахьаркыратә напхгаҩыс аҟаларазы ааԥхьара лырҭеит – аҳәса рвокал-инструменталтә ансамбль «Гәында» анапхгаҩы, Аԥсны жәлар рартистка, аорден «Ахьӡ-Аԥша» III аҩаӡара акавалер Роза Чамагәуа.
