Лаҵарамза 1 инаркны аҩнҵҟатәи аусқәа Рминистрра хаҭалатәи аилазаара зегьы ирӷәӷәоу аусура арежим ахь ииагахоит.
Роберт Киут Гагра араион аҩныҵҟатәи аусқәа Русбарҭа аҿаԥхьа ихадоу ахыдҵа ықәиргылеит – Аԥсны атәылауааи традициала аԥсшьаҩцәа реиҳарак аԥсшьаразы еиҳа иалыркаауа Гагра араион ахь иаауа атуристцәеи ршәарҭадара алыршара.
«Атәыла аҩныҵҟатәи аусқәа Рминистрра анапхгараҭара ҷыдала ахылаԥшра анаҭалоит Гагреи Гәдоуҭеи араионқәа рҿы аҩныҵҟатәи аусқәа русбарҭақәа русуа, избан акәзар акурорттә сезон аан ароуп аиҳарак аԥсшьаҩцәа ахьеизо», - ҳәа иҳәеит аминистр. Уи иара убас амилициатә аушьҭра-гәаҭаратә ҭыԥ «Мысра» аҿы аусура аиӷьтәра ахымԥадатәра ахшыҩзышьҭра аиҭеит.
Аминистр иажәақәа рыла, акурорттә сезон аан акадрқәа реиҭныԥсахлара мҩаԥгахоит, амилициатә аушьҭра-гәаҭаратә Ҭыԥ «Мысра» ахь Аԥсны егьырҭ араионқәа рҟынтәи амилициа аусзуҩцәа аусуразы идәықәҵахоит.
Хазы аминистр дазааҭгылеит амилициа аусзуҩцәа рҭеиҭыԥш азҵаара, иара убас урҭ атәылауааи ареспублика иаҭаауа асасцәеи ҳаҭырла рацәажәара шрыхәҭоу азгәаҭан. Иара убас аминистр Гагра араион аҩнҵҟатәи аусқәа Русбарҭа аусура аиӷьтәра азы ажәалагалқәа реиқәыршәареи ахәаԥшразы рыдгалареи рзы адҵа ықәиргылеит.
Ихадоу аҟәшеиҵақәа русура аиӷьтәра азы атәыла аҩныҵҟатәи аусқәа Рминистрра анапхгараҭара аганахьала Гагра араион аҩыныҵҟатәи аусқәа Русбарҭа аҿы акадртә еиҭакрақәа мҩаԥгазарр алшоит ҳәа иазгәаҭан.
«Ҳара реалла алҵшәақәа раиура ҳазыԥшуп. Араион ауааԥсыреи уи иаҭаауа асасцәеи ршәарҭадара алыршазароуп. Шәара шәахь ахыдҵақәа иацлалоит», - ҳәа аусуратә еилатәара хыркәшо инаҵшьны иазгәеиҭеит атәыла аҩныҵҟатәи аусқәа рминистр Роберт Киут.
