Аҟәа. Мшаԥымза 24, 2024 шықәса. Аԥсныпресс. Урыстәыла иҟоу Аԥсны ацҳаражәҳәаҩ Алхас Кәыҵниа Лугансктәи арҵаҩратә Университет аҭоурых, жәларбжьаратәи аизыҟазаашьақәеи асоциал-политикатә наукақәеи Ринститут астудентцәеи арҵаҩцәеи дырԥылеит. Аиԥылара мҩаԥысит Москва ақалақь аҿы иҟоу Аԥсны Аҳәынҭқарра Ацҳаражәҳәарҭа аҿы.
Аԥсны Аҳәынҭқарра Ацҳаражәҳәарҭа апресс-маҵзура иҟанаҵо адыррақәа рыла, астудентцәеи урҭ рнапхгаҩцәеи еиуеиԥшым азҵаарақәа рыҟаҵара азы алшара рыман. Заԥхьаҟа жәларбжьаратәи аизыҟазаашьақәа рганахьала аус зураны иҟоу Аԥсны аҭоурых, адәныҟатәи аполитика, Аԥсны Аҳәынҭқарреи Урыстәылатәи Афедерациеи, егьырҭ адипломатиатә еизыҟазаашьа зыбжьоу аҳәынҭқаррақәеи рыбжьара аусеицура ҳаамҭазтәи аҭагылазаашьеи ҳаԥхьаҟатәи аперспективақәеи, жәларбжьаратәи аконтактқәа рыҿиареи рырҭбаареи азҵаарақәа рзы азҿлымҳара аадырԥшуан .
Аиԥылара иалахәыз иҟоу жәларбжьаратәи аҭагылазаашьа,миҿыцу урыстәылатәи арегионқәеи Аԥсни рыкәша-макәша имҩаԥысуа ахҭысқәа, агеополитикатә процессқәа, уҳәа рзы ргәаанагарақәа еибырҳәеит, иара убас акультуратә, аҵарадырратә, анаукатә усхкқәа рҿы аусеицура иадҳәалоу азҵаарақәа ирылацәажәеит.
Лугансктәи арҵаҩратә Университет арҵаҩцәа ироуз алшара рхы иархәаны, Аԥснытәи аҳәынҭқарратә Университет еиҳа инарҭбаау аимадара абжьаҵара аганахьала ацхыраара азы Алхас Кәыҵниа иахь аҳәара ҟарҵеит. Алхас Кәыҵниа Ацҳаражәҳәарҭа аганахьала Лугансктәи арҵаҩратә Университети Аԥснытәи аҳәынҭқарратә Университети рыбжьара аҵараиурҭабжьаратәи аусеицуреи аимадареи рыбжьаҵара алыршара азы иахәҭоу ашьаҿақәа зегьы шыҟаҵахо азы асасцәа агәра диргеит.
