Аҟәа. Мшаԥымза 24, 2024 шықәса. Аԥсныпресс. Аԥснытәи аҳәынҭқарратә Университет аҿы иаартхоит Москватәи аҳәынҭқарратә жәларбжьаратәи аизыҟазаашьақәа Ринститут (МГИМО) ашкол.
ААУ аректор Алеко Гәарамиа апрофессор-рҵаҩратә еилазаареи астудентцәеи евроатлантикатә шәарҭадара Ацентри жәларбжьаратәи аҭҵаарақәа Ринститути аусзуҩ, ажурнал «Международная аналитика» аредактор Хада, Москватәи аҳәынҭқарратә жәларбжьаратәи аизыҟазаашьақәа Ринститут (МГИМО) Урыстәыла адәныҟатәи аполитикеи жәларбжьаратәи аизыҟазаашьақәеи ркафедра адоцент, аҭоурыхтә наукақәа ркандидат Сергеи Маркедонови реиԥылара иазкыз аусмҩаԥгатә аҿы абри азы адырра ҟаиҵеит.
ААУ асистемаҿы аус рулоит Москватәи аҳәынҭқарратә жәларбжьаратәи аизыҟазаашьақәа Ринститут (МГИМО) апрофессор-рҵаҩратә еилазаара ахаҭарнакцәа, еицырдыруа аҵарауаа, аполитологцәа. Дара жәларбжьаратәи аизыҟазаашьақәа, аглобалтә економика, ҳаамҭазтәи аимакқәа рхыҵхырҭақәеи иҟалар зылшо рыхҟьаԥҟьақәеи ирылацәажәалоит, атехнологиатәи, аекономикатәи суверенитет ҳазну адунеи аҿы ҭыԥс иааннакыло.
ААУ аректор Алеко Гәарамиа иажәақәа рыла, мшаԥымза 25 рзы Москватәи аҳәынҭқарратә жәларбжьаратәи аизыҟазаашьақәа Ринститут (МГИМО) аректор Анатоли Торкунов авидеоаацҳамҭа ааишьҭоит, уаҟа иара ААУ аҟны иарбоу аҵараиурҭа (МГИМО) ашкол аартразы ажәалагала ҟаиҵоит.
ААУ а-Telegram-канал аҿы иҟоу адыррақәа рыла, Сергеи Маркедонов адунеитә политика актуалра злоу амшхәаԥштә, еиҳа аԥыжәара змоу алахәыла дахьалкаам жәларбжьаратәи аизыҟазаашьақәа рсистема, жәларбжьаратәи аҭагылазаашьа, Аԥсни Урыстәылеи реизыҟазаашьақәа, уҳәа атема иазку алекциа ала дықәгылеит.
Аиԥылара рхы аладырхәит Аԥсны Аҳәынҭқарра Ахада Иусбарҭа анапхгаҩы Абесалом Кәарҷиа, адәныҟатәи аусқәа рминистр Инал Арӡынба, Ашәарҭадара Ахеилак амаӡаныҟәгаҩ Сергеи Шамба, иара убас Аԥсны иҟоу Урыстәылатәи Афедерациа аусқәа рзы аамҭала агәрагатә зинмчы змоу Максим Литвинов.
Аԥсны адәныҟатәи аусқәа рминистр Инал Арӡынба иажәақәа рыла, ашкол аартра аинтерес азааирԥшит Москватәи аҳәынҭқарратә жәларбжьаратәи аизыҟазаашьақәа Ринститут (МГИМО) аректор Анатоли Торкунов. Иара аинтерес имоуп Аԥсны шыҿио адырра, хаҭала ААУ аҭаара игәҭакуп. Инал Арӡынба агәыӷра ааирԥшит ашкол аҿы алекциақәа рымҩаԥысра адагьы ԥхьаҟатәи амҩа аазыртыша ауаа рԥыларақәа ҟалап ҳәа.
