Иарбоу аизакхьӡынҵа аҿы абжьаратәи, иҷыдоу азанааҭ-техникатәи иреиҳаӡоуи аҵарадырра аусхкы аҿы аспециалистцәа ргәаанагара убар алшоит. Урҭ дара русура адагьы, иахьатәи амш азы иҟоу апроблемақәагьы ирылацәажәоит. Аҵарадырра ахаҭабзиареи уи иадҳәалоу аусхкқәа русура азы ихымԥадатәиу азанааҭқәеи рзы ргәаанагара рҳәоит аусдкылаҩцәагьы.
Ҭамила Мерцхәлааԥҳа идуӡӡаны иҭабуп ҳәа лҳәеит Аԥсны ашәахтәқәеи аизгақәеи рзы Аминистрра, араионтә шәахтә инспекциақәа «Анаплакқәа реизакхьӡынҵа-2024» аиқәыршәараан аинформациа аизгараҿы активла иҟарҵоз ацхырааразы.
Аӡыргаратә усмҩаԥгатә аҿы иқәгылеит аҵара аминистр ихаҭыԥуаҩ Ада Кәарҷелиа, аҵарадырреи анаукеи абызшәатә политикеи адинхаҵареи амассатә информациа ахархәагақәа русқәеи рзы апарламенттә Еилакы ахантәаҩы Инар Садзба, аҳҭнықалақь Ахадара аҵара Аусбарҭа анапхгаҩы Асҭанда Ҭаркьыл, ахатә школ «Алашара адиректор Марина Ԥлиа, Аԥсны раԥхьатәи IT-школ адиректор Дамеи Џьонуа.
Дара зегьы Ахәаахәҭа-ааглыхратә Палата иҿыцу аизакхьӡынҵа аҭыҵра адырныҳәалеит, доусу русура иалацәажәеит, иҟоу апроблемақәеи урҭ ӡбышьас иарҭоуи иазааҭгылеит, иара убас Аԥсны аҵарадырра аҩаӡара ашьҭыхра азы азеиӷьашьарақәа ҟарҵеит.
Аусмҩаԥгатә аофициалтә хәҭа аныхыркәшаха ашьҭахь, аӡыргара иалахәыз зегьы аҭыԥантәи аусдкылаҩцәеи анаплакыҩцәеи, Ахәаахәҭра-ааглыхратә Палата иалахугьы уахь иналаҵаны иҭрыжьыз аалыҵ ргьамақәа гәарҭеит. Урҭ гәахәарыла ирыхәаԥшит жәлар рмузыкатә инструментқәеи амҿы иалху амаҭәахәқәеи.
Изҭаху зегьы аҭыԥантәи акомпотқәа, ашәырқашьқәа, ауараш, аџьемқәа, ашьақаркамфеҭқәа, ишьақаррку ашәыр, амармелад, ашәырҩақәа, алаҳарҩа, аҵәаршьышьы, ачаи, ауҭраҭых, аххылақәа, уҳәа ргьамақәа рбар рылшон.
Аусмҩаԥгатә аҿы иқәгылеит Оҭар Хәынцариа ихьӡ зху жәлар рмузыкатә инструментқәа раркестр.
