Аҟәа ақалақь Ахадара Асанитар-епидемиологиатә Станциа асанитартә ҳақьым хада Армине Симониан ауадақәа зегьы асасцәа рыдкыларазы иазхиоуп ҳәа иазгәалҭеит.  

«Аномерқәа еиԥшӡам, аха урҭ зегьы иахәҭоу ала еибыҭоуп, аԥсшьаразы иаҭаху зегьы ыҟоуп. Асанатортә нормативқәа рыла зегьы иахәҭоу аҩаӡараҿы еиқәыршәоуп. Арыцқьаратә еиқәыршәагақәа ақалақьтә црыӡмҩангагатә система иаҿакуп», - ҳәа илҳәеит лара.

Акурорттә сезон макьаназы официалла иаадмыртӡацт, аха акомплекс аҿы мшаԥымза аҵыхәтәантәи амчыбжь азы рыԥсы ршьахьеит 200-ҩык ауаа. Лаҵарамза алагамҭазы еиҳагьы асасцәа раара иазыԥшуп.  

Акурорт-зҩыдахаратә комплекс «Страна души» администратор Иулиа Кравцова хыԥхьаӡара рацәала атуристцәа раара иазыԥшуп ҳәа илҳәеит.   

«Ҳара уажәы акурорттә сезон аартра ҳазыԥшуп. Лаҵарамза 1 азы иҟалоит  1000-ҩык инареиҳаны аԥсшьаҩцәа, урҭ рыдкылара ҳазхиоуп», - ҳәа илҳәеит лара.  

Аԥсны атуризм Аминистрреи Асанитар-епидемиологиатә Станциеи русзуҩцәа иара убас акрыфарҭагьы гәарҭеит.

Атуризм Аминистрра адыррақәа рыла, сынтәа ҭаацәаныла атуристцәа рацәаҩны раара иазыԥшуп. Атуристтә обиектқәа анҭыҵтәи ргәаҭарақәа ирӷәӷәоу арежим ала имҩаԥыслоит.

Агәаҭарақәа атуристцәа рыдкылара аобиектқәа рҿы мацара акәымкәа азеиԥш крыфарҭақәа рыҿгьы имҩаԥысуеит.  Ҷыдала ахшыҩзышьҭра аҭахоит еиуеиԥшым аттракционқәа рҿы ашәарҭадара аиқәышәара.