Одиссеи Бигәаа иациҵеит, Аԥсны аҭынч еиҿцәажәарақәа рзы еснагь ишаарту, шьаҿа-шьаҿала ус шакәуу шаанарԥшуа, есымшатәи аиҿцәажәарақәа рылахәрагьы уи шышьақәнарӷәӷәо.
Аделегациа аилазаараҿы иҟоуп: Аԥсны адәныҟатәи аусқәа Рминистрра аусзуҩцәа хәҩык, иара убасгьы аиҿцәажәарақәа ирылахәуп Аахыҵ Уаԥстәыла, Урыстәыла, Америкатәи Аидгылақәа, Қырҭтәыла, ООН, ЕС, ОБСЕ. Аиҿцәажәарақәа ҩ-усуратә гәыԥк имҩаԥыргоит – ашәарҭадареи агуманитартә зҵаарақәеи рхырхарҭақәа рыла.
«Аԥсуа ган зныкымкәа аҽазишәахьеит Қырҭтәыла Аԥсни Аахыҵ Уаԥстәылеи рганахь ала амч ахархәара мап ацәкразы аҩ-ганк еидызкыло аиқәшаҳаҭра аԥҵареи анапаҵаҩреи. Аха ҳара уи иҵоураны иаҳзымыӡбацт иахьа уажәраанӡагьы» ҳәа иҳәеит иара.
Уи зыхҟьо ҳәа ишьоит Қырҭтәыла аиқәшаҳаҭра анапаҵаҩра ахьаҭахыми ари азҵаара аганахьала аконструктивтә диалог ахьыҟами.
Иара убас, ареспублика адәныҟаполитика усбарҭа аминистр ихаҭыԥуаҩ инапынҵақәа назыгӡо, аиҿцәажәарақәа рҿы Урыстәыла адгылара иҟанаҵо аҵак ду шамоу инаҵшьны иазгәеиҭеит. Уи иҟанаҵо аҽазышәарақәа ирыбзоураны арегион аҿы иахьагьы аҭышәынтәалареи ашәарҭадареи еиқәханы иҟоуп ҳәа азгәеиҭеит Одиссеи Бигәаа.
