«Ҵыбыргуп, Аԥсны – ари ахәҭакахьала иазхаҵоу ҳәынҭқарроуп, ҳара ҳинтересқәа азырхоуп ишалшо ала ирацәаны егьырҭ аҳәынҭқаррақәа рыла Аԥсны асуверенитет азхаҵара алыршара. Ҳара Аԥсны аҳәынҭқарратә асуверенитет азхаҵара азы аҭакԥхықәра зхахьы изгаз атәылақәа реиҩызареи рпартниорреи рдипломатиатә еимадареи даара ҳаҭыр ҳзақәуп, еиҷаҳарыла ҳазныҟәоит, интенсивла аимадара ҳабжьоуп», - ҳәа иҳәеит Олег Барцыц.
Иара Никарагуа, Венесуела, уҳәа егьырҭ аҳәынҭқаррақәеи Аԥсни ирыбжьоу адипломатиатә еизыҟазаашьақәа интенсивла рыҿиара ҿырԥштәыс иааигеит. Убас, аамҭа кьаҿ иалагӡаны абизнес-миссиа Аԥснынтәи Никарагуаҟа ицараны иҟоуп. Аҭаара аҳәаақәа ирҭагӡаны еиуеиԥшым аусхкқәа рыла аҳәынҭқаррабжьаратәи аизыҟазаашьақәа рышьақәгылареи аоперациатәи аинтеграциатәи аимадарақәа рырӷәӷәареи иадҳәалоу азҵаарақәа рылацәажәара азԥхьагәаҭоуп.
